ދިވެހީންގެ ފަރާތުން ހަދިޔާކުރި 5000 ކާބޯތަކެތީގެ ޕެކޭޖް، އިންޓަނޭޝަނަލް އެއިޑް ކެމްޕެއިން (އައިއޭސީ) އިން ޣައްޒާގެ ރައްޔިތުންނަށް ފޯރުކޮށްދީފިއެވެ.

އައިއޭސީ އިން އެކްސްގައި ކުރި ޕޯސްޓެއްގައި ބުނީ އުތުރު ޣައްޒާއަކީ ހަމަލާތަކުގައި އެންމެ ބޮޑަށް ހަލާކުވި ސަރަހައްދު ކަމަށާއި، އެ ސަރަހައްދުގައި މިވަގުތު ތިބި އާއިލާތަކަށް އެހީ ވެދެވުމަކީ ލިބޭ ވަރަށް ބޮޑު އުފަލެއް ކަމަށެވެ.

މީގެ އިތުރުންވެސް އައިއޭސީ އިން ބުނީ، 5000 ކާބޯތަކެތީގެ ޕެކޭޖް މިވަނީ އުތުރު ޣައްޒާގއި ބެހިފައިވާ ކަމަށާއި، މިވަގުތު އެ ސަރަހައްދުގައި ތިބި އާއިލާތަކަށް މިއީ ވަރަށް ބޮޑު ލުޔަކަށް ވާނެ ކަމަށް އުންމީދު ކުރާ ކަމަށެވެ.

ކޮންމެ ދުވަހަކުވެސް އެކި ގޮތްގޮތުން ފަލަސްޠީނު ރައްޔިތުންނަށް އެހީވުމުގެ މަސައްކަތްތައް ކުރަމުންދާ ކަމަށާއި މަސައްކަތްތައް ހުއްޓައެއް ނުލާނެ ކަމަށާއި މި މަސައްކަތުގައި ސާބިތުކަން ދެއްވުމަށާއި މި އެހީ އެ ރައްޔިތުންނަށް ރައްކާތެރިކަމާއެކު ލިބުމަށާއި އިޒްރޭލުގެ ލާއިންސާނީ އަނިޔާތަކުން ޣައްޒާގެ ރައްޔިތުން ސަލާމަތް ކޮށްދެވުން އެދި ދުޢާ ކޮށްދެއްވުމަށް ވެސް އައިއޭސީއިން ވަނީ އެދިފައެވެ.

ނިރުބަވެރި އިސްރާއީލުން ފަލަސްތީންގެ ޣައްޒާއަށް ދެމުންގެންދާ ހަމަލާތަކުގެ ސަބަބުން އެތައް ބަޔަކު ޝަހީދުވެ ޒަހަމްވެފައިވާއިރު، ކާނެ އެއްޗެއް ނުލިބި، ޣައްޒާގެ ރައްޔިތުން ދަނީ ވަރަށް ބޮޑު ވޭނެއް ތަހައްމަލު ކުރަމުންނެވެ. ހައިހޫނު ކަމުގެ ސަބަބުން ޣައްޒާގެ ކުޑަކުދިންނާއި ބޮޑެތި މީހުންވެސް ދަނީ ދުނިޔެ ދޫކުރަމުންނެވެ.