ކުރިއަށް އޮތް 20 ވަނަ ރައްޔިތުންގެ މަޖިލީހުގެ މެޖޯރިޓީ އިދިކޮޅު މައި ޕާޓީ، އެމްޑީޕީއަށް ލިބޭނެ ކަމަށް އެ ޕާޓީގެ ރައީސް އަދި ކުރީގެ ޚާރިޖީވަޒީރު އަބްދުالله ޝާހިދު ވިދާޅުވެއްޖެއެވެ.
ޝާހިދު މިފަދައިން ވިދާޅުވީ ރައްޔިތުންގެ މަޖިލީހުގެ ކެންޕެއިނަށް ހުވަދުއަތޮޅު ދެކުނުބުރީގެ ބައެއް ރަށްރަށުގައި މަޖިލިސް އެމްޑީޕީ ކެންޑިޑޭޓުން ކުރަމުންދާ މަސައްކަތުގައި ބައިވެރިވުމަށް ފުރާވަޑައިގަންނަވަމުން މިއަދު އެކްސްގައި ކުރެއްވި ޕޯސްޓެއްގައެވެ.
"މިސްރާބު ހަމަމަގަށް އެޅުވުމަށް މުޅި ރާއްޖެއަށްފެތުރި ތަރުތީބުވެ އެމްޑީޕީ ކެންޑިޑޭޓުން ކުރަމުންގެންދަނީ ފޯރިގަދަ ކެމްޕޭނެއް. މަޖިލީހުގެ މެޖޯރިޓީ الله ގެ އިރާދަފުޅާއެކު އެމްޑީޕީއިން ނަގާނީ ބޮޑުތަނުން." ޝާހިދު ވިދާޅުވި އެވެ.
މިހާރު ހިނގަމުންދާ 19 ވަނަ ރައްޔިތުންގެ މަޖިލީހުގައި އެމްޑީޕީން ވަނީ ސްޕަ މެޖޯރިޓީ ހޯދާފައެވެ. މިފަހުން އެ ޕާޓީގެ ގިނަ މެންބަރުންތަކެއް ޕާޓީ ދުކޮށް ސަރުކާރާއި ގުޅުނު ނަމަވެސް، އަދިވެސް މަޖިލީހުގެ މެޖޯރިޓީ އޮތީ އެމްޑީޕީ އަތުގައެވެ.
އަދި އެމްޑީޕީން ބުނެފައިވާ ގޮތުން ކުރިއަށް އޮތް ރައްޔިތުންގެ މަޖިލީހުގެ އިންތިޚާބު ކާމިޔާބު ކޮށް، މަޖިލީހުގެ މެޖޯރިޓީ ހޯދާނީ އެޕާޓީންނެވެ.
އެމްޑީޕީން ބުނާގޮތުން، ސަރުކާރު ހަމަ މަގަށް އަޅުވައި، ސަރުކާރުން އޮޅުވާލާ އޮޅުވާލުންތައް ރައްޔިތުންނަށް ހާމަ ކުރުމަށް، މަޖިލީހުގެ މެޖޯރިޓީ އިދިކޮޅަށް ލިބިފައި އޮތުމަކީ މުހިންމު ކަމެކެވެ.
Advertisement
This content is created and paid for by advertisers and does not involve Voice Journalists
