އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ، އެމްޑީޕީގައި އިސްކޮށް ހަރަކާތްތެރިވި ފަރާތްތަކެއް ހިމެނޭހެން، އދ.މަހިބަދޫ ގިނަ އަދަދެއްގެ ޒުވާނުން ވެރިކަންކުރާ ޕީއެންސީއާ ގުޅިއްޖެއެވެ.
ޕީއެންސީ މަހިބަދޫ ދާއިރާގެ ކެންޑިޑޭޓް، އަހުމަދު ޠާރިގުގެ ކެންޕެއިން ރަސްމީކޮށް އިފްތިތާޙް ކުރުމަށް މިރޭ މަހިބަދޫގައި ބޭއްވި ޖަލްސާގައި، މަހިބަދޫގެ ގާތްގަނޑަކަށް 22 ޒުވާނުން ޕީއެންސީއާ ވަނީ ގުޅިފައެވެ.
އޭގެ ތެރޭގައި، 20 ވަނަ ރައްޔިތުންގެ މަޖިލީހުގައި އެމްޑީޕީގެ ފަރާތުން ވާދަކުރައްވާ ކެންޑިޑޭޓް ހޮވުމަށް ބޭއްވި ޕްރައިމަރީގައި ވާދަކުރެއްވި ދެ ކެނޑިޑޭޓުންނާއި، 19 ވަނަ މަޖިލީހުގައި އަދާލަތު ޕާޓީގެ ޓިކެޓްގައި މަޖިލީހަށް ވާދަކުރެއްވި ކެންޑިޑޭޓް ވެސް ހިމެނެއެވެ.
މީގެ އިތުރުން، ނިމިދިޔަ ރިޔާސީ އިންތިޚާބުގައި ކުރީގެ ރައީސް އިބްރާހިމް މުހައްމަދު ޞާލިހަށް ދެވަނަ ދައުރެއް ހޯއްދަވައި ދެއްވުމަށް އިސްކޮށް ހަރަކާތްތެރިވި އެމްޑީޕީގެ އެހެން ފަރާތްތައްވެސް ވަނީ ޕީއެންސީއާ ގުޅިފައެވެ.
އެހުރިހާ ފަރާތްތަކުގެ ފޯމާއި ހަވާލުވެވަޑައިގެންނެވީ ޕީއެންސީގެ ޗެއާޕާސަން އަބްދުއްރަހީމް އަބްދުالله އެވެ.
މި ޖަލްސާގައި ވާހަކަ ދައްކަވަމުން، ޕީއެންސީއާއި އަލަށް ގުޅުނު، އެމްޑީޕީގެ ފަރާތްތަކުން ވަނީ އަދުގެ ސަރުކާރަށް ތާއީދު ކުރައްވައި، މަޖިލީހަށް ސަރުކާރުގެ ކެންޑިޑޭޓް އިންތިޚާބު ކުރުމަށް މަސައްކަތް އެދިފައެވެ. އަދި ތަރައްގީ ގެނެވޭނީ ސަރުކާރުގެ ކެންޑިޑޭޓް އިންތިޚާބު ކޮށްގެން ކަމަށްވެސް އެ ފަރާތްތަކުން ވަނީ ބުނެފަ އެވެ.
Advertisement
This content is created and paid for by advertisers and does not involve Voice Journalists
