ކ.މާފުށީގައި މިއަދު ހިންގި މާރާމާރީއެއްގައި މީހަކު ޒަހަމް ކޮށްލައި، ހަމަ މިއަދު އެރަށުގައި ހިންގި އިތުރު މާރާމާރީއަކާއި ގުޅިގެން ދެމީހުން ފުލުހުން ހައްޔަރުކޮށްފިއެވެ.

ފުލުހުން ބުނީ މާފުށީގައި ހިންގި މާރާމާރީއެއް ގައި އަނިޔާ ލިބިފައިވާ މީހަކަށް މާފުށި ހޮސްޕިޓަލްގައި ފަރުވާދެމުންދާ ކަމަށް މިއަދު ފަތިހު 5:30 ހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ. އަނިޔާ ލިބިގެން ފަރުވާ ދެމުންދަނީ 34 އަހަރުގެ ދިވެހި ފިރިހެނަކަށް ކަމަށާއި، އެމީހާއަށް މިހާރު ފަރުވާ ދެމުންދަނީ ޓްރީ ޓޮޕް ހޮސްޕިޓަލް ގައި ކަމަށް ވެސް ފުލުހުން ވަނީ ބުނެފައެވެ.

މީގެ އިތުރުންވެސް ފުލުހުން ބުނީ މާފުށިގައި މިއަދު ހިންގި އިތުރު މާރާމާރީ އަކާއި ގުޅިގެން ދެމީހަކު ހައްޔަރު ކުރިކަމަށާއި، އެއީ ދިވެހި ދެ ފިރިހެނުން ކަމަށެވެ. ހައްޔަރު ކުރި ދެމީހުންނަކީ ފަތިހު އެ ރަށުގައި ހިންގި މާރާމާރީ ގައި ބައިވެރިވި ބައެއް ކަން މިހާތަނަށް ބެލި ބެލުމުން އެނގިފައިވާ ކަމަށް ވެސް ފުލުހުން މައުލޫމާތު ދެއެވެ.

ފުލުހުން އަންނަނީ މި މައްސަލަ އިތުރަށް ތަހުގީގު ކުރަމުންނެވެ.