ހަށިވިއްކުމުގެ ތުހުމަތުގައި އައްޑޫ ސިޓީ އިން 10 މީހަކު ހައްޔަރުކޮށްފިއެވެ.

އެމީހުން ހައްޔަރުކޮށްފައިވަނީ އައްޑޫ ސިޓީގައި ހަށި ވިއްކުމުގެ ވިޔަފާރި ކުރާ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެން މާޗު މަހުގެ 7 ވަނަ ދުވަހު ހިތަދޫ އާއި މަރަދޫގައި ފުލުހުން ހިންގި އޮޕަރޭޝަނެއްގެ ތެރެއިންނެވެ.

ފުލުހުން ބުނީ މި އޮޕަރޭޝަންގައި، ހިތަދޫގެ ގެއެއް ބަލާ ފާސްކޮށް، ދިވެހި 2 ފިރިހެނުންނާއި، ތައިލެންޑް 3 އަންހެނުން ހައްޔަރުކޮށްފައިވާ ކަމަށެވެ. މިމީހުންގެ ބަންދާއި މެދު ގޮތެއް ނިންމުމަށް މިމަހުގެ 8 ވަނަ ދުވަހު ހިތަދޫ މެޖިސްޓްރޭޓް ކޯޓަށް ހާޒިރުކުރުމުން، އެ އެންމެން ވެސް 14 ދުވަހަށް ބަންދު ކުރުމަށް ކޯޓުން ވަނީ އަމުރުކޮށްފައެވެ.

މީގެ އިތުރުންވެސް، މަރަދޫގައި ހިންގި އޮޕަރޭޝަންގައި ފުލުހުން ވަނީ ސްޕާ އެއްގެ ގޮތުގައި ހިންގަމުންދިޔަ ތަނެއް ބަލާ ފާސްކޮށް ދިވެހި ފިރިހެނަކާއި، އިންޑިއާ ފިރިހެނަކާއި، މިޔަންމާ ފިރިހެނެއްގެ އިތުރުން، ތައިލެންޑް 2 އަންހެނުން ހައްޔަރުކޮށްފައެވެ.

މަރަދޫ އިން ހައްޔަރު ކުރި މީހުންގެ ބަންދަށް ގޮތެއް ނިންމުމަށް މާޗު މަހުގެ 8 ވަނަ ދުވަހު މަރަދޫ މެޖިސްޓްރޭޓް ކޯޓަށް ހާޒިރުކުރުމުން، އިންޑިއާ ފިރިހެން މީހާގެ 4 ދުވަހަށް އަދި ދެން ބާކީ ތިބި 4 މީހުން 10 ދުވަހަށް ބަންދު ކުރުމަށް ވަނީ އަމުރުކޮށްފައެވެ.

ފުލުހުން އަންނަނީ މި ދެ މައްސަލަ ވެސް ތަހުގީގު ކުރަމުންނެވެ.