އެމަނިކުފާނުގެ ސަރުކާރުގައި ކުރަން ފެއްޓެވި ހުރިހާ މަސައްކަތްތަކެއް އަދުގެ ޕީޕީއެމް/ޕީއެންސީ ސަރުކާރުން ހުއްޓާލާފައިވާ ކަމަށް ކުރީގެ ރައީސް އަދި އެމްޑީޕީގެ އެޑްވައިޒަރ އިބްރާހިމް މުހައްމަދު ޞާލިހު ވިދާޅުވެއްޖެއެވެ. 

20 ވަނަ ރައްޔިތުންގެ މަޖިލީހުގައި އެމްޑީޕީގެ ޓިކެޓްގައި ނިލަންދޫ ދާއިރާއަށް ވާދަކުރައްވާ ކެންޑިޑޭޓް، ޢަލީ ރިޒާގެ ކެންޕެއިން ޖަލްސާގައި އިއްޔެ ވާހަކަ ދައްކަވަމުން ރައީސް ޞާލިހު ވިދާޅުވީ، މިސަރުކާރުގެ ފުރަތަމަ ތިން މަސްދުވަސް ނިމިގެންދިޔައިރުވެސް ރައްޔިތުން ބޭނުންވާ މިސްރާބަށް ކަންކަން ނުދާ ކަމަށެވެ. 

މިއާއެކު ޞާލިހު ވިދާޅުވީ، ފައިސާ ނެތް ކަމަށް ސަރުކާރުން ބުނަމުން ދިޔަ ނަމަވެސް ފެންނަމުންދަނީ ދުވަހުން ދުވަހަށް ސިޔާސީ މަގާމުތައް އިތުރުކުރަމުންދާ މަންޒަރު ކަމަށާ، ސަރުކާރުން އަމާޒު ހިފާފައި ވަނީ 1500 ސިޔާސީ މަގާމް އުފެއްދުމަށް ކަމަށެވެ. 

ރައީސް ޞާލިހު ވިދާޅުވިގޮތުގައި ދައުލަތުގެ ބަޖެޓުގައި ފައިސާ ނެތީ ސިޔާސީ މަގާމްތަކަށް ކުރަމުންދާ ޚަރަދުތަކުގެ ސަބަބުންނެވެ. 

ރައީސް ޞާލިހް މިހެން ވިދާޅުވެފައި ވާއިރު، ރައީސް މުޢިއްޒު ރަށްރަށަށް ކުރައްވަމުންދާ ދަތުރުފުޅު ތަކުގެ ތެރެއިން އެމާނިކުފާނު ވަނީ ބައެއް މަޝްރޫޢުތައް ކުރިއަށް ނުގޮސް، ނޫނީ ލަހުން ކުރިއަށް ދަނީ، ބަޖެޓްގައި އެ މަސައްކަތް ތަކަށް ފައިސާ ކަނޑައަޅާފައި ނުވުމުން ކަމަށާ، ބައެއް މަޝްރޫޢުތައް ހަވާލު ކޮށްފައިވާ ކުންފުނި ތަކަށް ފައިސާ ދީފައި ނުވާތީވެސް މަޝްރޫއުތައް ހުއްޓިފައިވާ ކަމަށް ވިދާޅުވެފައެވެ.