އަންނަ މަހުގެ 21 ވަނަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލިސް އިންތިހާބުގެ ރީރެޖިސްޓްރޭޝަނަށް އިލެކްޝަން ކޮމިޝަން (އީސީ) އިން ހުޅުވާލައިފިއެވެ.
އީސީ ގެ ނައިބު ރައީސް އިސްމާއީލް ހަބީބް މިއަދު އެކްސް ގައި ކުރެއްވި ޕޯސްޓެއްގައި ވިދާޅުވީ، މަޖިލީހުގެ އިންތިޚާބު ގައި ވޯޓުލާން ރަޖިސްޓަރީވެފައިވާ ރަށް ނޫން އެހެން ތަނެއްގައި ވޯޓުލުމަށްޓަކައި ރަޖިސްޓަރީވުމުގެ ފުރުޞަތު ހުޅުވާލާފައިވާ ކަމަށެވެ.
އީސީން މި ފުރުސަތު ހުޅުވާލައިފައިވަނީ، 2024 މާރިޗު 10 ވާ އާދީއްތަ ދުވަހުގެ މެންދުރު 02:00 އިން ފެށިގެން 2024 މާރިޗު 16 ވާ ހޮނިހިރު ދުވަހުގެ މެންދުރުފަހު 03:00 ގެ ނިޔަލަށެވެ. އެހެންކަމުން ރީރެޖިސްޓްރީ ކުރަން ބޭނުންވާ ފަރާތްތަކުން ދުރާލާ އޮންލައިންކޮށް ރީ ރެޖިސްޓްރީ ކުރުމަށް ހަބީބް ވަނީ އެދިލައްވާފައެވެ.
ރައްޔިތުންގެ މަޖިލީހުގެ އިންތިހާބު ކުރިއަށް އޮތް ރޯދަ މަހުގެ ފަހުން ބާއްވާނަމަ، އިންތިހާބުގައި ވޯޓު ލުމަށް ރީރަޖިސްޓްރީ ކުރުމަށް އިތުރު ފުރުސަތެއް ދޭނެ ކަމަށް މީގެ ކުރިން އީސީން ވަނީ ބުނެފައެވެ.
މަޖިލިސް އިންތިހާބު މި މަހުގެ 17 ވަނަ ދުވަހު ބޭއްވުމަށް މީގެ ކުރިން ކަނޑައަޅާފައި އޮތް ނަމަވެސް އިންތިހާބު ފަސްވީ، ރޯދަ މަހަށް ފަހު 10 ދުވަސް ފަހުން އިންތިހާބު ބޭއްވުމަށް މަޖިލީހުން ފާސްކުރި ބިލު ރައީސް ޑރ.މުއިއްޒު މިދިޔަ މަހުގެ 29 ވަނަ ދުވަހު ތަސްދީގު ކުރެއްވުމާއި ގުޅިގެންނެވެ.
Advertisement
This content is created and paid for by advertisers and does not involve Voice Journalists
