ސާގު ފަންޏަކީ ހަށިގަނޑުގައި ވަރު ޖައްސާލަދޭ މީރު ބުއިމެކެވެ. ޚާއްސަކޮށް ހާރު ދަމަށް ސާގު ފަނި ތަށްޓެއް ބޯލުމުން އެދުވަހަކު ގައިން ހަކަތަ ގޮސް، ވަރުބަލިވުން ކުޑަ ކޮށްދެއެވެ. އެހެންކަމުން، އަޅުކަމުގައި ވެސް ހީވާގި ކަމާއި އެކު އުޅެވޭނެ މަގުފަހި ވެގެންދެއެވެ. 

1 ޖޯޑު ސާގު

1 ދަޅު ގެރި ކިރު

1 1/2 ޖޯޑު ފުލް ކްރީމް މިލްކު

5 އިންޗި ރާނބާފަތް

1 ސައި ސަމުސާ ވެނީލާ އެސެންސް

5 ޖޯޑު ފެން

ކާކުލަ ކޮޅެއް (ބޭނުން ނަމަ)

1) ދެ ޖޯޑު ފެން ތެއްޔަކަށް އަޅައި، އެ ކެކެން ފެށުމުން ސާގު މަޑު މަޑުން އަޅަމުން ހަލުވަމުންދާށެވެ. ހުރިހާ ސާގު އެޅުމުން އެއްކޮށް ހަލުވާލުމަށްފަހު އުންދުން ނިއްވާލާށޭވެ. ދެން ފުރޭންޏަކަށް އަޅައި ސާގު ކޮޅު ފުރާނާލާފައި ރީތި ފެނުންވެސް ސާގު ކޮޅު ދޮވެލާށެވެ.

2) ދެން ތެއްޔަކަށް ބާކީ ހުރި ފެނާއި ރާނބާފަތާއި އަޅާފައި ކައްކާށެވެ. ފެން އެތި ކެކެން ފެށުމުން ސާގު ކޮޅު މަޑު މަޑުން އަޅާލާށެވެ. 

3) މެދު ގިނީގައި ބަހައްޓައިގެން ސާގުކޮޅު ކެކެންދެން ކައްކާށެވެ. ކެކުނީމައި ހުންނާނީ އެތެރެ ފެންނަ ގޮތަށެވެ. އަދި ކެކެމުން ދާއިރު ސާގުތައް އެއްވެ ތަތްވިޔަ ނުދިނުމަށްޓަކައި ގިނަގިނައިން ހަލުވަންވާނެއެވެ.

4) ސާގު ކޮޅު ކެކުމުން ގެރި ކިރު ދަޅާއި، ފުލް ކްރީމް މިލްކް އަޅާލާފައި އެކުލަވާލާށެވެ. ދެން ތެލީގައިވާ ތަކެތި ބޮކިޖަހާ ކެކި ގަނެ އޮލަ ވަންދެން ކައްކާނީއެވެ. ކައްކާއިރު އިރު އިރު ކޮޅާ، ގިނަގިނައިން ހަލުވަންވާނެއެވެ. 

5) ސާގު ފަނި އޮލަ ވުމުން ވެނީލާ އެސެންސް ފޮދާއި ކާކުލަ ކޮޅު އަޅާފައި އެކުލަވާލުމަށްފަހު އުނދުން ނިއްވާލާށެވެ. ސާގު ފަނި އެހުރީ ކެކިފައެވެ.