ސަބްމެރިން އަކީ ރޯދަމަހު ގިނަ ގޭގޭގެ ސުފުރާމަތިން ފެންނަ، ވަރަށް ގިނަ މީހުންނަށް މީރު ކެއުމެކެވެ. މިއަދު ވޮއިސްގެ ބަދިގެއިން މި ގެނެސްދެނީ ޗިލީ ޗިކަން ސަބްމެރީން ތައްޔާރު ކުރާނެ ގޮތެވެ. ކިޔުންތެރިންނަށް ކަމުދާނެ ކަމަށް އުއްމީދު ކުރަމެވެ. 

4 ސަބްމެރީން ބަނަސް

2 ސައިސަމުސާ ބަޓަރު (ބަނަހުގައި އުނގުޅައިލުމަށް)

1 ބޮޑު ފިޔާ (ކުދިކޮށް ކޮށާފައި)

4 ލޮނުމެދު (ކުދިކޮށް ކޮށާފައި)

½ ބެލް ޕެޕަރ (ކުދިކޮށް ކޮށާފައި)

5 ހިކި މިރުސް (ކުދި ކުދިކޮށް ކޮށާފައި) 

4 މޭޒުމަތީ ސަމްސާ ފްރައިޑް ޗިކަން ސޯސް

2 ސައިސަމްސާ އޮއިސްޓަރ ސޯސް

2 ސައި ސަމުސާ ސޯޔާ ސޯސް 

7 ފޮތި ޗެޑަރ ޗީޒް

ލޮނު

500 ގްރާމް ކުކުޅު

½ ގިތެޔޮ މިރުސް (ކުދިކޮށް ކޮށާފައި)

2 ލެޓިޔުސްފަތް (ކޮށާފައި) 

ސަބްމެރިން ސޯސް

1) ކުކުޅުކޮޅު ކުދިކޮށް ކޮށާލުމަށްފަހު، ލޮނު ކޮޅެއް އަޅައި އެކުލަވާލުމަށްފަހު ރަން މުށި ކުލަ އަރަންދެން ފްރައި ކޮށްލާށެވެ. 

2) ތަވައެއްގެ ތެރެއަށް ތެޔޮ އެޅުމަށް ފަހު ހޫނު ވުމުން ލޮނުމެދު އަދި ހިކި މިރުން އަޅައި ކުޑަކޮށް ފްރައި ކޮށްލުމަށްފަހު އެއްށް ފިޔާ އަޅައިވެސް ހަލުވަމުން ފްރައި ކޮށްލާށެވެ. ދެން ބެލް ޕެޕަރ އަޅައި ވެސް ރަނގަޅަށް އެކުލަވައިލާށެވެ. ރަހަ ލާ ވަރަށް ލޮނު ކޮޅެއްވެސް އަޅާލާށެވެ.  

3) އެއަށް ފަހު ކުކުޅު ކޮޅުވެސް އެއަށް އަޅައި ރަނގަޅަށް އެއްކޮށްލުމަށްފަހު، ފްރައިޑް ޗިކަން ސޯސް ވެސް އަޅައި އެކުލަވައިލާށެވެ. 

4) ދެން އުނދުން ނިއްވާލުމަށްފަހު 3 ޗީޒް ފޮތިތައް ތެލީގެ ތެރެއަށް އަޅައިލާ އެއްކޮށްލުމަށް ފަހު ޗީޒްތައް ވިރެންދެން އެކުލަވައިލާށެވެ.

5) އެއަށްފަހު ސަބްމެރީން ބަނަސްތައް ފަޅައިލާށެވެ. އަދި ކޮންމެ ބަނަހެއްގެ އެތެރޭގައި ރަނގަޅަށް ބަޓަރު އުނގުޅުމަށް ފަހު ހޫނުކޮށްފައިވާ ތަވައެއްގެ މަތީގައި ފިހެލާށެވެ. 

6) ދެން ބަނަހުގެ ދެފަޅީގައި ސަބްމެރިން ސޯސް އުނގުޅާ ލުމަށްފަހު ކުރިން ތައްޔާރުކުރި މަސްގަނޑު 4 ބަޔަށް ބަހާލުމަށް ފަހު ބަނަހުގެ ތެރެއަށް އަޅައިލާށެވެ.

7) ފަހު ކަމަކަށް، އޭގެ މައްޗަށް ގިތެޔޮ މިރުސް ކޮޅެއް އަޅާލުމަށްފަހު، ލެޓިޔުސްފަތްވެސް އަޅާލުމަށް ފަހު، ކޮންމެ ސަބްމެރިން އަކަށް އެއް ޗީޒް ފޮތި ތިނެސްކަންވާ ގޮތަށް ފަޅާލުމަށްފަހު، ސަބްމެރިން މަސްގަނޑު މަތީގައި ބަހަށްޓާށެވެ. ދެން ސަބްމެރީންތައް އަވަނުން ފިހެލާށެވެ.