ރައްޔިތުންގެ މަޖިލީހުގެ ޖުމްލަ މެންބަރުންގެ އަދަދަކަށް ވަންޖެހޭނީ ގަނޫނު އަސާސީގައި ކަނޑައަޅާފައިވާ އަދަދު ކަމަށް ސްޕްރީމް ކޯޓުން ހުކުމް ކޮށްފައި ވަނިކޮށް އެ ނިންމުމާއި ޚިލާފަށް މަޖިލީހުގެ ޖުމްލަ މެނަބަރުންގެ އަދަދީ 80 ކަމަށް މިއަދު މަޖިލީހުން ފާސްކޮށްފިއެވެ.

މަޖިލީހުގައި ތިއްބަވާ 87 މެންބަރުންގެ ތެރެއިން ހަތް މެންބަރަކު މި ސަރުކާރުގެ މަގާމުތަކަށް ވަޑައިގަތުމަށް އިސްތިއުފާ ދެއްވުމުން، އެމްޑީޕީގެ އަޣުލަބިއްޔަތު އޮންނަ މަޖިލީހުން ވަނީ އިސްތިއުފާ ދޭ މެންބަރުން ނުހިމަނައި ޖުމްލަ އަދަދު ގުނުމަށް މަޖިލީހުގެ ގަވައިދަށް އިސްލާހު ގެނެސްފައެވެ.

އެ އިސްލާހު ބާތިލު ކުރަން ބަންޑާރަނައިބުގެ އޮފީހުން ސުޕްރީމް ކޯޓަށް މައްސަލަ ހުށަހެޅުމުން، ސުޕްރީމް ކޯޓުން ގޮތެއް ނިންމުމުގެ ކުރިން އެ މާއްދާ ބާތިލުކޮށް، ހަމަ އެމާއްދާގައި ހިމެނޭ ކަންކަން ހިމަނައިގެން އިތުރު މާއްދާއެއް މަޖިލީހުގެ ގަވާއިދަށް ވަނީ މާއްދާއެއް އިތުރު ކޮށްފައެވެ.

ބަންޑާރަނައިބުގެ އޮފީހުން ހުށަހެޅި މައްސަލައިގައި ސުޕްރީމް ކޯޓުން މިދިޔަ މަހުގެ 29ގައި ނިންމާފައި ވަނީ މެމްބަރުންގެ ޖުމްލަ އަދަދު ގުނަން ވާނީ ހުސްވެފައިވާ ގޮނޑިތައް ވެސް ހިމަަނައިގެން ކަމަށާއި 49 ވަނަ މާއްދާއަށް ގެނައި ބަދަލު ގާނޫނުއަސާސީއާ ހިލާފު ކަމަށެވެ.

ސުޕްރީމް ކޯޓުގެ އެ ހުކުމާ ގުޅިގެން ވިލިނގިލި ދާއިރާގެ އެމްޑީޕީ މެންބަރު ސައުދު ހުސައިން ވަނީ، އަނެއްކާވެސް މަޖިލީހުގެ ޖުމްލަ އަދަދު 80 މެންބަރުން ކަމަށް ކަނޑައަޅަން ހުށަހަޅުއްވާފައެވެ.

އެ ހުށަހެޅުމާ ގުޅޭ ގޮތުން ނެގި ވޯޓުގައި ބައިވެރިވެވަޑައިގެންނެވި 25 މެންބަރުންގެ ތެރެއިން 23 މެންބަރަކު އެގޮތަށް ފާސްކުރަން ރުހުން ދިންއިރު، ދެކޮޅަށް ވޯޓު ދިނީ ދެ މެންބަރުންނެވެ.

މަޖިލީހުގެ ގަވައިދަށް ގެނައި އިސްލާހުން އެމްޑީޕީ މެންބަރުންނާއި އިދިކޮޅުގައި އޮތް ދަ ޑިމޮކްރެޓްސްގެ މެންބަރުންގެ ވޯޓުން ރައީސުލްޖުމްހޫރިއްޔާއާއި ނައިބު ރައީސް އަޒުލުކުރުމުގެ ބާރު ވެސް ލިބިގެންދާނެއެވެ.