ރޯދަމަހު ރޯދަވީއްލަން ތައްޔާރުކުރާ ހެދިކާ ތަކުގެ ތެރެއިން ކަޓްލެޓްސް އަކީ ވަރަށް ގިނަ މީހުންނަށް ކަމުދާ އެއްޗެކެވެ. އާއްމުކޮށް ގިނަ މީހުން އަލުވި އިން ކަޓްލެޓްސް ހަދައި އުޅުނަސް ބަނބުކެޔޮ ތިޔާގި މިފަދަ މޫސުމެއްގައި ބަނބުކެޔޮ ކަޓްލެޓްސް އަކީވ ކޮންމެހެންވެސް އަޖުމަ ބަލާލަންޖެހޭ އެއްޗެކެވެ.  އަލުވި ކަޓްލެޓްސް އަށްވުރެ ތައްޔާރު ކޮށްލަންވެސް މާ ފަސޭހަވާނެ އެވެ. 

1 ދަޅު މަސް

1 ޖޯޑު ބަނބުކެޔޮ (ފެނުކައްކައި މަޑު ކުރުމަށްފަހު މޮޑެފައި)

1 ގިތެޔޮ މިރުސް (ކުދިކޮށް ކޮށާފައި)

1 ސައިސަމުސާ އަސޭމިރުސް

2 ފިޔާ (ކުދިކޮށް ކޮށާފައި)

1 ލުނބޯގެ ހުތް

4 ބިސް (ގިރާފައި)

2 ޖޯޑު ފާރޮށިކުނޑި

ހިކަނދިފަތް

ތެޔޮ (ތެލުލުމަށްޓަކައި)

ލޮނު

1) ފިޔާ، މިރުސް، ހިކަނދިފަތް އަދި ލޮނު އެއްކޮށް ރަނގަޅަށް މޮޑެލުމަށްފަހު އޭގެ ތެރެއަށް ލުނބޯ ހުތް އަޅާފައި ވެސް ރަނގަޅަށް މޮޑެލާށެވެ.

2) ދެން މަސްދަޅު އަޅާލާފައި މޮޑެލުމަށްފަހު މަޑު ކޮށްފައިހުރި ބަނބުކެޔޮ ކޮޅު އަޅާލާފައިވެސް ރަނގަޅަށް މޮޑެލާށެވެ. އަދި އަސޭމިރުސްކޮޅު އަޅާފައި ހުރިހާ އެއްޗެއް މޮޑެ އެކުލަވާލާށެވެ.

3) ދެން މަސްގަނޑުން ކުދި ގުޅަ ހަދާލާށެވެ.

4) ކަޓްލެޓްސް ގުޅަތައް ގިރާފައި ހުރި ބިސް އެތީގެ ތެރެއަށް ލުމަށްފަހު ފާރޮށިކުނޑި އެއްޗަށް ލައި ވަށައިގެން ރަނގަޅަށް ފާރޮށިކުނޑި ހާކާށެވެ. (މި ސްޓެޕް އަދި އެއްފަހަރު ތަކުރާރު ކޮށްލައިފި ނަމަ ކަޓްލެޓްސް ވަރަށް މީރުވާނެ އެވެ) 

5) ދެން އުނދުން މައްޗަށް ތެޔޮ އެއްޗެއް އުދާފައި، ތެޔޮ ހޫނުވީމާ ފާރޮށިކުނޑި ލާފައި ހުރި ކަޓްލެޓްސްތައް ރަތްވަންދެން ތެލުލާށެވެ.