ދައުލަތުގެ ދަރަނި މެނޭޖުކުރުމަށް ސަރުކާރުން ގެންގުޅޭ ސިޔާސަތުތައް ހާމަކުރުމަށް ގޮވައިލައި ރައްޔިތުންގެ މަޖިލީހަށް ގަރާރެއް ހުށަހަޅުއްވައިފިއެވެ.

މި ގަރާރު މިއަދު ކުރިއަށް ދިޔަ މަޖިލީހުގެ ޖަލްސާއަށް ހުށަހަޅުއްވާފައި ވަނީ ގަލޮޅު އުތުރު ދާއިރާގެ މެންބަރު އީވާ ޢަބްދުالله އެވެ. 

އީވާ ހުށަހެޅުއްވި ޤަރާރަކީ ދައުލަތް ދަރަނިވެރިވެފައިވާ މިންވަރާއި، އެ ދަރަނި ބެލެހެއްޓިފައިވާ ގޮތާއި، އެ ދަރަނި އަނބުރާ ދެއްކުމަށް ދައުލަތުގެ އާމްދަނީ ޖާގަދޭނެ މިންވަރު ދެނެގަނެ، ދައުލަތުގެ ދަރަނި ބެލެހެއްޓުމަށް ސަރުކާރުން ކުރާ މަސައްކަތް އިތުރަށް ހަރުދަނާކުރުމަށް ގޮވާލައި ހުށަހަޅާފައިވާ ގަރާރެކެވެ. 

އީވާގެ ޤަރާރުގައި ބުނީ، ދަރަނި މެނޭޖުކުރުމާ ގުޅޭ ގޮތުން 27 އޮކްޓޯބަރ 2020 ވަނަ އަހަރުގައި ރައްޔިތުންގެ މަޖިލީހުގެ މުޅި މަޖިލިސް ކޮމިޓީން ސަރުކާރަށް ލަފައެއް އަރުވާފައިވާކަމަށް ޤަރާރުގައި ފާހަގަކުރިއެވެ. އެއިރު ލަފާދީފައިވަނީ ދަރަނި ރިސްޓްރަކްޗާކުރާނެ ޚާއްޞަ ކޮމިޓީއެއް އެކުލަވައިލާ ރާއްޖެއާއި ބޭރުގެ ކަމާ ގުޅޭ މާހިރުންގެ ލަފާ ހޯދައި ކޮމިޓީއާ ގުޅޭ މަސައްކަތްތައް 8 މަސްތެރޭގައި މަސައްކަތް ނިންމައި ރިޕޯޓެއް ރައީސުލްޖުމްހޫރިއްޔާއަށާއި މަޖިލީހަށް ހުށަހެޅުމަށެވެ. ނަމަވެސް މި ލަފައަށް އެއިރުގެ ސަރުކާރުން އަމަލުކޮށްފައިނުވާ ކަން ފާހަގަކޮށްފައިވެއެވެ.

ރާއްޖޭގައި ހިންގާ ޕަބްލިކް އިންވެސްޓްމަންޓް މަޝްރޫޢުތަކުގައި، ގައުމުގެ ތަރައްގީއަށް އަމާޒުވާނެ ފެންނަން ނެތް ކަމަށާ، އެހެންކަމުން ވަށާ ޖެހޭ ތަރައްޤީގެ ޕްލޭނެއް އެކުލަވައިލާ އެ ޕްލޭނަކީ ރާއްޖޭގެ މާލީ ރާއްޖޭގެ މާލީ ހާލަތާ އެކަށޭނެ ޕްލޭނެއްކަމަށްވާންވާނެ ކަމަށްވެސް ބުނެފައިވެއެވެ. 

އޭގެ އިތުރަށް ރާއްޖޭގެ އިޤުތިޞާދީ ހާލަތު ރަނގަޅުކުރެވި މާލީ ހާލަތު އިތުރަށް ރަނގަޅުކުރުމަށް ޕްލޭނެއް އެކުލަވައިލާ އާންމުކުރަންޖެހޭ ކަމަށާއި، މާލީ ދެމެހެއްޓެނެވިކަން ޤާއިމުކުރުމަށް ރާވާފައިވާ ގޮތާއި ތަރައްޤީގެ މަޝްރޫޢުތަކުގެ ޚަރަދު އަންދާޒާތައް އަދި ސްޓްރެޓިޖިކް ޕްލޭން އާންމުކޮށް ހާމަކުރުމަށް އީވާގެ ޤަރާރުގައި ގޮވާލައްވައިފިއެވެ. 

އަދި ދައުލަތުގެ ދަރަނި އަނބުރާ ދެއްކުމަށާއި، ދައުލަތުގެ މާލީ ދެމެހެއްޓެނިވިކަން ގާއިމް ކުރުމަށް ރާވާފައިވާ ގޮތާއި، ތަރައްޤީގެ މަޝްރޫޢުތަކުގެ ޚަރަދު އަންދާޒާތައް އަދި ސްޓްރެޓިޖިކް ޕްލޭން އާންމުކޮށް ހާމަކުރުމަށް އީވާގެ ޤަރާރުގައި ހުށަހަޅުއްވާފައި ވެއެވެ.