އިލެކްޝަން ކޮމިޝަން (އީސީ) އަށް މެންބަރުން އައްޔަންކުރުމުގެ ބާރު ރައްޔިތުންގެ މަޖިލީހަށް ލިބޭ ގޮތް ހެދުމަށް އިސްލާހެއް ހުށައަޅައިފިއެވެ.

އީސީ އަށް މެމްބަރުން އައްޔަން ކުރުން ރައްޔިތުންގެ މަޖިލީހަށް އޮތުން މުހިންމު ކަމަށް ވިދާޅުވެ، މި އިސްލާހު ގާނޫނަށް ގެނައުމަށް ހުށައެޅުއްވީ ހޮޅުދޫ ދާއިރާގެ އެމްޑީޕީ މެމްބަރު ޔޫނުސް އަލީ އެވެ.

ޔޫނުސް ހުށައެޅުއްވި މި އިސްލާހު މިއަދުގެ ޖަލްސާގައި ތައާރަފުކޮށްފައިވާއިރު، މި އިސްލާހު ބުނާގޮތުން އެ ކޮމިޝަނަށް މެންބަރަކު އައްޔަންކުރަން ބޭނުންވާ ކޮންމެ ފަހަރަކު އެކަމަށް އެދޭ ފާރާތްތައް ހޯދުމަށް ރައްޔިތުންގެ މަޖިލީހުގެ އިދާރާއިން އާންމުކޮށް އިއުލާންކުރުމުން، އެކަމަށް އިޖާބަދޭ މީހުންގެ ނަންތައް މިނިވަން މުއައްސަސާތަކުގެ ކޮމިޓީން ދިރާސާކޮށް ކޮމިޓީގެ ރިޕޯޓު ރައްޔިތުންގެ މަޖިލީހަށް ހުށައަޅަންޖެހެއެވެ.

Advertisement

މި އިސްލާހުގެ ދަށުން ރައީސުލްޖުމްހޫރިއްޔާ އަށް ދޭ ހަމައެކަނި ދައުރަކީ، އީސީގެ މެމްބަރުކަމަށް މަޖިލީހުން ފާސްކުރާ ބޭފުޅަކު މެމްބަރަކު ކަމަށް އައްޔަން ކުރެއްވުމެވެ.

ގާނޫނުގައި މިހާރުވާ ގޮތުން، އީސީ އަށް މެމްބަރުން އައްޔަންކުރުމުގެ ބާރު ރައީސުލްޖުމްހޫރިއްޔާ ލިބިފައިވާއިރު، އެ ކޮމިޝަނަށް މެމްބަރުން އައްޔަނު ކުރާނީ ޢާންމުކޮށް އިއުލާނު ކޮށްގެން ނަން ހުށައަޅުއްވާ ބޭފުޅުންގެ ނަންތައް ރައީސުލްޖުމްހޫރިއްޔާ މަޖިލީހަށް އެ ނަންތައް ފޮނުވައިގެން މަޖިލީހުން ފާސްކުރެއްވުމުންނެވެ. 

މިގާނޫނު އިސްލާހު ކުރުމަށް މަޖިލީހަށް ހުށައަޅާފައިވަނީ، އެކޮމިޝަނުގެ މެންބަރުކަމުގައި ހުންނެވި އިސްމާޢީލް ޙަބީބުގެ ދައުރު ހަމަވުމާއި ގުޅިގެން އެކޮމިޝަނުގެ މެންބަރުކަމަށް މިހާރުގެ ސެކްރެޓަރީ ޖެނެރަލް ހަސަން ޒަކަރިއްޔާ އައްޔަން ކުރުމަށް ރައީސް ޑރ. މުއިއްޒު މަޖިލީހަށް ފޮނުއްވައިފައި ވަނިކޮށެވެ.