ސަރުކާރު ކޯލިޝަންގެ ފަރާތުން މާލެ ސިޓީގެ ދާއިރާތަކަށް ވާދަކުރައްވާ ކެންޑިޑޭޓުންނަށް ތާއީދު ހޯދުމަށް ޕީއެންސީގެ ރައީސް އަދި ކޯލިޝަން ލީޑަރު ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ކުރިއަށް ގެންދަވާ ދޮރުންދޮރަށް ކުރިއަށް ގެންދާނީ ގަލޮޅު ދެކުނުގައި ކަމަށް ބުނެފިއެވެ.

ޕީއެންސީ / ޕީޕީއެމް ކޯލިޝަނުން ބުނީ ގަޮލޮޅު ދެކުނުގެ ދޮރުން ދޮރަށް ކެންޕެއިން ހަރަކާތަށް ރައީސް މުއިއްޒު، ފައްޓަވާނީ މިއަދު މެންދުރު 1:45 ގައި މަޖީދީ މަގު ބަނޫން ސްޕޯޓްސް ކުރިމަތިން ކަމަށެވެ.

ރައީސް މުޢޮއްޒު ވަނީ އިއްޔެވެސް ހެންވޭރު ހުޅަނގު ދާއިރާގެ ގެތަކަށް ދޮރުން ދޮރަށް ހިންގަވާފައެވެ.

ކުރިއަށް އޮތް މަޖިލީސް އިންތިހާބަށް ޕީއެންސީގެ ޓިކެޓް ގައި 89 ކެންޑިޑޭޓުން ނިކުމެ އެވެ. އަދި ތިން ދާއިރާއަކަށް ވާދަ ކުރާ ތިން ޕާޓީގެ ލީޑަރުންނަށް އެ ކޯލިޝަންގެ ތާއީދު ވަނީ ދީފައެވެ. އެގޮތުން ތާއީދު ކޮށްފައި ވަނީ އެމްޑީއޭގެ ރައީސް އަހުމަދު ސިޔާމް، އެމްއެންޕީގެ ރައީސް މުހައްމަދު ނާޒިމްގެ އިތުރުން މާމިގިލީ ދާއިރާގެ މެންބަރު ގާސިމް އިބްރާހީމަށެވެ. 

ރައްޔިތުންގެ މަޖިލީހުގެ އިންތިޚާބު ބޭއްވުމަށް ހަމަޖެހިފައިވަނީ އަންނަ އޭޕްރީލް މަހުގެ 21 ވަނަ ދުވަހުއެވެ. 

މި އިންތިޚާބުގައި ވޯޓުލެވޭ މީހުންގެ އަދަދު 284،887 އަށް ވަނީ އަރާއިރު، އެ އިންތިހާބުގައި 368 ކެންޑިޑޭޓަކު ވާދަކުރާނެއެވެ. އެއީ 42 އަންހެނުންނާއި އަދި 326 ފިރިހެނުންނެވެ.