ކުއްޅަފިލާފަތު މަސްހުންޏަކީ ރޯދަ ވީއްލުމަށް ވަރަށް ގިނަ މީހުންނަށް ކަމުދާ ވަރަށް ސިއްހަތަށްވެސް ފައިދާ ހުރި އެއްޗެކެވެ. ފިލާ މަސްހުންޏަކީ ބަތްޕެނާއި، ރޮށްޓާއި އަދި ބަތާއި އެކު ކާލަންވެސް ވަރަށް މީރު އެއްޗެކެވެ. އެހެންކަމުން، މިއަދު ވޮއިސްގެ ބަދިގެއިން މި ގެނެސްދެނީ ވަރަށް މީރުކޮށް ފިލާ މަސްހުނި ތައްޔާރު ކުރާނެ ގޮތެވެ. ޔަގީނުންވެސް ތަފާތުވެފައި މީރުވާނެ އެވެ. 

1 ޖޯޑު ކުއްޅަފިލާ ( ތުނިކޮށް ކޮށާފައި) 

1 ދަޅު މަސް 

1/4 ޖޯޑު ހިމުންކޮށްފައި ހުރި ވަޅޯމަސް (ބޭނުން ނަމަ) 

3/4 ޖޯޑު ހުނި

1 ބޮޑު ފިޔާ ( ތުނިކޮށް ކޮށާފައި)

1/2 ސައި ސަމުސާ ލޮނުމެދު ޕޭސްޓް

1/3 ސައިސަމުސާ އިނގުރު ޕޭސްޓް

ހިކަނދިފަތް ( ކުދިކޮށް ކޮށާފައި)

1 ލުނބޮލުގެ ހުތް

1 ގިތެޔޮ މިރުސް ( ތުނިކޮށް ކޮށާފައި)

1/2 ސައި ސަމުސާ މުގުރި އަސޭމިރުސް

1/3 ސައި ސަމުސާ ދިރި

1 މޭޒުމަތީ ސަމުސާ ރިހާކުރު

ލޮނު

1/2 ޖޯޑު ފެން

1) ތައްޓެއްގެ ތެރޭގައި ފިޔާ، ލޮނުމެދު، ގިތެޔޮ މިރުސް، ލޮނު އަދި އިނގުރު ރަނގަޅަށް މޮޑެލާށެވެ. ދެން ލުނބޯ ހުތާއި ހިކަނދިފަތްވެސް އެއަށްއަޅާފައި މޮޑެލާށެވެ. 

2) އެއަށްފަހު އޭގެ ތެރެއަށް ރިހާކުރު އަޅައިގެން މޮޑެލުމަށްފަހު މަސްދަޅާއި ވަޅޯމަސް އަޅާފައިވެސް މޮޑެލާށެވެ. 

3) ދެން ހުނި ކޮޅު އަޅަލުމަށްފަހު ދިރި އަދި އަސޭމިރުސް އަޅައިގެން އެއްކޮށް މަސްހުނި ގަނޑު މޮޑެލުމަށްފަހު، ފެން އަޅައި އެކުލަވާލައި، ލޮނު ހެޔޮވަރު ކޮށްލާށެވެ. އެއަށްފަހު ލޮނު ހެޔޮވަރު ކޮށްލާށެވެ. 

ފިލާ މަސްހުންޏަކީ ބަތްޕެނާއި، ރޮށްޓާއި އަދި ބަތާއި އެކު ކާލަންވެސް ވަރަށް މީރު އެއްޗެކެވެ.