ހުޅުމާލެ ދެވަނަ ފިޔަވަހީގައި ހުންނަ ސްޓެލްކޯގެ ޓްރާންސްފޯމަރަކުން ވައްކަން ކުރަން އުޅެނިކޮށް، ކަރަންޓުގައި ޖެހި މީހަކު ނިޔާވެއްޖެއެވެ.
މިކަމާއި ގުޅިގެން ފުލުހުން ބުނީ، ޕެޓްރޯލް ކުރުމުގައި ހަރަކާތްތެރިވި ފުލުހުންނަށް ރޭ 4:07 ހާއިރު ހުޅުމާލެ ދެވަނަ ފިޔަވަހީގެ ހިޔާ ޓަވަރު 3 ކައިރީ ހުންނަ ޓްރާންސްފޯމަރު ތެރެއިން އެމީހާ ފެނިފައިވަނީ ކަރަންޓުގައި ޖެހި އަނިޔާ ތަކަކާއި ވެއްޓިފައި އޮއްވާ ކަމަށެވެ.
ހޮސްޕިޓަލުން ފުލުހުންނަށް މައުލޫމާތު ދިން ގޮތުގައި، އެމީހާ ހޮސްޕިޓަލަށް ގެންދިޔަ އިރުވެސް ނިޔާވެފައިވާ ކަމަށާއި މިހާދިސާގައި ނިޔާވެފައިވަނީ 27 އަހަރުގެ މީހެއް ކަމަށް ވެސް ފުލުހުން މައުލޫމާތު ދެއެވެ.
ފުލުހުން ބުނީ މި މައްސަލަ އާއި ގުޅޭ ގޮތުން ފުލުހުން ބަލަން ޖެހޭ ކަންކަން ބަލަމުން އަންނަ ކަމަށެވެ.
ސްޓެލްކޯގެ ސްޓެލްކޯގެ ޓްރާންސްފޯމަރުތަކުން ވައްކަން ކުރާ މައްސަލަ ބޮޑުވެ، އެ ކަމުގެ ކަންބޮޑުވުން ފާޅުކުރައްވަމުން ކުންފުނީގެ އެމްޑީ ހުސައިން ފަހުމީ ވެސް ވަނީ އެއީ ވައްކަން ކުރާ މީހުންނަށް ވެސް ނުރައްކާތެރި ކަން ހަނދާންކޮށްދީފައެވެ.
ހުޅުމާލޭގެ އެކި ސަރަހައްދުތަކުން ބުރާސްފަތި ދުވަހުގެ ރޭ ފަތިހާއި ހުކުރު ދުވަހުގެ ރޭ ކަރަންޓު ކެނޑެން މެދުވެރިވ ސަބަބަކީވެސް ޓްރާންސްފޯމަރުތަކުން ވައްކަން ކުރުން ކަމަށާއި، މިފަދަ ކަންކަން ކުރަމުންގެންދާ ފަރާތްތައް ހުއްޓުވައި އެފަރާތްތަކަށް ފިޔަވަޅު އަޅައިދީ، ޓްރާންސްފޯމަރު ތައް ވަގަށް ނަގައިގެން ވިއްކާ، މިދަފަ ތަކެތި ގަންނަ ފަރާތްތަކަށް ފިޔަވަޅުއަޅައިދިނުމަށް ފަހުމީ ވަނީ ކަމާބެހޭ ފަރާތްތަކަށް ގޮވާލައްވާފައެވެ.
Advertisement
This content is created and paid for by advertisers and does not involve Voice Journalists
