ދިވެހިރާއްޖޭގެ ކަނޑުގެ ސަރަހައްދު 24 ގަޑި އިރު ބެލެހެއްޓުމަށް، ދިވެހި ސިފައިންގެ އެއާ ކޯއަށް ގެނެވުނު އަންމޭންޑް އޭރިއަލް ކޮމްބެޓް ވެހިކަލް (ޔޫ.އޭ.ވީ) ޑްރޯންތައް ގަންނަން ކުރި ޚަރަދު ރައްޔިތުންގެ މަޖިލީހުގެ 241 ކޮމިޓީގައި ހާމަ ކުރެއްވިދާނެ ކަމަށް ދިފާޢީ ވަޒީރު ޣައްސާން މައުމޫން ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ދިފާއީ ވަޒީރު މަޖިލީހަށް ހާޒިރު ކުރައްވައި ސުވާލު ކުރުމަށް ހުޅުވާލި ފުރުސަތުގައި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވަނީ ރާއްޖޭގެ ސަރަހައްދު ބަލަހަށްޓަން ރާއްޖެއަށް ގެނައި އަސްކަރީ ޑްރޯންތައް ގެނައީ ދައުލަތުގެ ބަޖެޓުން ކިހާ ފައިސާއެއް ޚަރަދު ކުރައްވައިގެންތޯ ސުވާލު ކުރައްވާފައެވެ. އަދި އެއިން އެއް ޑްރޯންގެ އަގަކީ ކޮބައިތޯވެސް އޭނާ ސުވާލުކުރެއްވިއެވެ.
އެ ސުވާލަށް ޖަވާބު ދެއްވަމުން ވަޒީރު ޣައްސާން ވަނީ، ދިވެހި އަސްކަރިއްޔާ ހޯދާފައިވާ ޔޫއޭވީތައް ހޯދާފައިވަނީ ދިވެހިރާއްޖޭގެ ގާނޫނު އަސާސީ އާއި ގާނޫނު ތަކުން އަދި ގަވާއިދު ތަކުން ދެފުށްފެންނަ ކަމަށް ކަނޑއެޅިފައިވާ ހުރިހާ އުސޫލެއްގެ ތެރެއިން ކަމުގެ ޔަގީންކަން މަޖީލަހަށް ދެއްވާފައެވެ. އަދި އެކަމުގެ ލިޔެކިޔުންތައްވެސް ހުންނާނެ ކަމަށާ އެ ބަލަން ބޭނުންވާ އިދާރާތްތަކާއި ހިއްސާ ކުރައްވާނެ ކަމަށް ވަޒީރު ވިދާޅުވުއެވެ.
އެކަމުގެ ހުރިހާ ލިޔެކިޔުންތައް ހުންނާނެ. ބައްލަވަން ބޭނުންފުޅުވާ ތަހުގީގީ އިދާރާތަކުން ބައްލަވަން ބޭނުންފުޅުވިއްޔާ ހުންނާނެ. އެކަން ކުރެވިފައިވަނީ ކަނޑައެޅިފައިވާ އުސޫލު ތަކުގެ ތެރެއިން. މިކަހަލަ ފޯރަމެއްގައި، އެއްވެސް ގައުމެއްގައި ދިފާއީ ގޮތުން ކުރާ ޚަރަދުތަކުގެ ތަފްސީލް ހާމަކުރުމަކީ ކުރާ ކަމެއް ނޫން. އެހެންކަމުން އެ މައުލޫމާތު މިތަނުގައި (މަޖިލިސް ޖަލްސާގައި) އާއްމު ކުރަން އަޅުގަނޑު އުޒުރުވެރިވަން. އެކަމަކު 241 ކޮމިޓީގައި، ސިއްރު ޖަލްސާއެއްގައި މި މަޢުލޫމާތު އަޅުގަނޑުމެންނަށް ހާމަ ކުރެވިދާނެ
ދިފާޢީ ވަޒީރު މުހައްމަދު ޣައްސާން މައުމޫން
ދިވެހިރާއްޖޭގެ އިގްތިސާދީ ކަނޑުގެ ސަރަހައްދު ބެލެހެއްޓުމަށް ތިން ޑްރޯން ގެނެސްފައިވާއިރު، އިގްތިސާދީ ސަރަހައްދު ބެލެހެއްޓުމަށް ގެނައި އާލާތްތައް ގެނެސްފައިވަނީ ތުރުކިޔޭގެ ހިލޭ އެހީގައި ކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ. އެކަމަށްޓަކައި އެމަނިކުފާނު ވަނީ ތުރުކިޔޭގެ ރައީސް އަށް ޝުކުރު ދަންނަވާފައެވެ.
ދިވެހިރާއްޖޭ އިން 974000 އަކަ ކިލޯމީޓަރަށް ދެމިގެންދާއިރު އެ ސަރަހައްދު ބެލެހެއްޓުމަށް ރާއްޖެއަށް ގެނެސްފައިވަނީ "ބައިރަކްތާރު ޓީބީ2″ ގެ ޑްރޯނެވެ.
ބައިރަކްތާރު ޓީބީ2" ޑްރޯނަކީ 18،000 އަދި 25،000 ފޫޓު މަތިން އުދުއްސޭނެ އުޅަނދުތަކެކެވެ. 70 އާއި 120 ކިލޯމީޓަރާ ދެމެދުގެ ބާރުމިނުގައި އުދުހެވޭ މި އުޅަނދުތަކަކީ ނައިޓް ވިޝަން ކޭޕަބިލިޓީ އާއެކު ރޭގަނޑުވެސް ވަގުތުން ފޮޓޯއާއި ވީޑިއޯ ފޮނުވޭނެ އުޅަނދެކެވެ. ހަމައެއާއެކު 300 ކިލޯމީޓަރު ދުރުން މައިމަރުކަޒަށް މައުލޫމާތު ފޯރުކޮށްދިނުމުގެ ގާބިލްކަން ލިބިފައިވާ މި ޑްރޯންތަކަށް ހުއްޓުމެއް ނެތި 27-50 ގަޑިއިރު އުދުހުމުގެ ގާބިލްކަން ވެސް ލިބިފައިވެއެވެ. އަދި ބޭނުންނަމަ ހަތިޔާރު ހަރުކުރެވޭ މި ޑްރޯންގެ ބޮޑުމިނަކީ 21 ފޫޓެވެ.
Advertisement
This content is created and paid for by advertisers and does not involve Voice Journalists
