އިންޑިއާ ސިފައިން ދިވެހިރާއްޖޭގެ ހާއްސަ އިގުތިސާދީ ސަރަހައްދުގައި ހަރަކާތްތެރިވަމުންދިޔަ ރާއްޖޭގެ މަސްދޯނި ތަކަށް އެރީ މިސްކޮމިއުނިކޭޝަނެއްގެ ސަބަބުން ކަމަށް ޚާރިޖީ ވަޒީރު މުހައްމަދު ޣައްސާން މައުމޫން ވިދާޅުވެއްޖެއެވެ.

މި އަހަރުގެ ޖެނުއަރީ 31 ގައި އިންޑިއާ ސިފައިން ވަނީ ދިވެހި ތިން މަސް ދޯނި ކަމަށްވާ އަސުރުމާ 3، މާހޯރަ 3، ނިރު 7 އަށް އަރާފައިވާއިރު އޭގެ ފަހުން، ޖެހިގެން އައި ދުވަހު ވެސް އިންޑިއާ ސިފައިން މާހޯރަ ދޯންޏަށް ވެސް އިންޑިޔާ ސިފައިން އަރާފައިވެއެވެ.

މި މައްސަލަ އާއި ގުޅިގެން މިއަދު ވަޒީރު ޣައްސާން މަޖިލީހަށް ހާޒިރު ކުރުމުން ރައްޔިތުންގެ މަޖިލީހުގެ މެމްބަރުންގެ ސުވާލުތަކަށް ޖަވާބުދެއްވަމުން އެބޭފުޅާ ވިދާޅުވީ، ދިވެހި މަސް ދޯނިތަކަކަށް އިންޑިއާ ސިފައިން އެރީ މިސް ކޮމިއުނިކޭޝަންއަކުން ކަމަށް އެ ގައުމުން ރަސްމީކޮށް މައުލޫމާތު ދީފައިވާ ކަމަށާއި އެއީ ތެދު ވާހަކައެއް ކަމަށް ގަބޫލުފުޅު ކުރައްވާކަމަށެވެ.

Advertisement

އެ ދުވަހުގެ އޮޕަރޭޝަންގެ މައުލޫމާތު ދިވެހި އަސްކަރިއްޔާއަށް ފޯރުކޮށްނުދީ އެ އޮތީ މިސްކޮމިއުނިކޭޝަން އެއްގެ ސަބަބުން ކަމަށާއި އާންމުކޮށް އެފަދަ އޮޕަރޭޝަންތައް ހިންގާނަމަ އެއް ގައުމުން އަނެއް ގައުމާ އެކު މުއާސަލަތު ކުރެވޭނެ ހަރުދަނާ ނިޒާމެއް އޮންނަ ކަން ވަޒީރު ޣައްސާން ފާހަގަ ކުރެއްވިއެވެ.

ވަޒީރު ޣައްސާން ވިދާޅުވީ، މަސްދޯނި ތަކަށް އިންޑިއާ ސިފައިން އެރީ މަސްވެރިން ސެޓަލައިޓް ފޯނު ބޭނުންކުރާތީ ކަމަށް މަސް ދޯނިތަކަށް ބޯޑުކުރި އިންޑިއާގެ އަސްކަރީ ޓީމުން ބުނެފައިވާ ކަމަށެވެ. ސެޓަލައިޓް ފޯނަކީ އިންޑިއާގެ ސަރަހައްދުގެ ތެރޭގައި މަނާ އެއްޗަކަށް ވީ ނަމަވެސް ރާއްޖޭގެ ސަރަހައްދުގައި ބޭނުން ކުރެވޭނެ ކަމަށް ވެސް ވަޒީރު ވިދާޅުވިއެވެ.

މީގެ އިތުރުންވެސް،ރާއްޖޭގެ ހާއްސަ އިގުތިސާދީ ސަރައްހަދުގެ ތެރެއިން  އިންޑިއާ ސިފައިން ހަތިޔާރާ އެކު ދިވެހި ތިން މަސްދޯންޏަކަށް އަރައި މަސްވެރިންގެ ފޯނުތައް ޗެކްކޮށް، އިންޑިއާ ސިފައިން ހަރަކާތްތެރިވާ ވީޑިއޯތަކާއި ފޮޓޯތައް ޑިލީޓްކުރިކަން ވެސް ވަޒީރު ވަނީ މިއަދު ކަށަވަރުކޮށްދެއްވާފައެވެ.