ރައްޔިތުންގެ ކަންކަމަށް ހުރަސްއަޅާ ބަޔަކު ކުރިއަށް ފަސް އަހަރަށް ރައްޔިތުންގެ މަޖިލީހަށް ހޮވުމާއިމެދު ރައްޔިތުން ވިސްނާލަންޖެހޭ ކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެވެ. 

ރައީސް މިފަދައިން ވިދާޅުވީ ޕީއެންސީ ޓިކެޓްގައި ކުރިއަށް ރައްޔިތުންގެ މަޖިލީހުގައި ފުވައްމުލަކު ދެކުނު ދާއިރާއަށް ވާދަކުރައްވާ ކެންޑިޑޭޓުގެ ކެންޕެއިން ޖަގަހަ ހުޅުވުމަށް ރޭ ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

އެގޮތުން ރައީސް ވިދާޅުވީ، ދިވެހީންގެ ރާއްޖެއަށް ދަތުރު ކުރުމަށް ފެށި މަސައްކަތުގެ މިހާތަނަށް ހާސިލް ވެފައިވަނީ ދެބައިކުޅަ އެއްބައި ކަމަށެވެ. އަދި ރައްޔިތުންގެ މަޖިލީހުގެ މެޖޯރިޓީ ސަރުކާރަށް ލިބުމަކީ ދިވެހީންގެ ރާއްޖެއަށް ދިޔުމަށް ކުރާ އުއްމީދުތައް ހާސިލްވުމަށް އެންމެ މުހިންމު ކަންތައް ކަމަށެވެ. 

Advertisement

މިއާއެކު ރައީސް ވަނީ މިހާރުގެ އެމްޑީޕީ މެޖޯރިޓީ އޮންނަ މަޖިލީހުން ސަރުކާރުން ފޮނުވަމުންދާ ބިލު ތަކާއިމެދު ކަންކަން ކުރައްވަމުން އަންނަ ގޮތަށް އަލި އަޅުއްވާ ލައްވާފައެވެ. 

އެގޮތުން ސަރުކާރުގެ ފަރާތުން މަޖިލީހަށް ހުށަހެޅުނު ސޮވެރެން ޑިވެލޮޕްފަންޑާއި ބެހޭ ބިލަކީ ރައްޔިތުންނަށް ނުހަނު މުހިންމު ބިލެއް ނަމަވެސް އިއްޔެ މަޖިލީހުން އެ ބިލު ބޭރުކޮށްލާފައިވާ ކަން އެމަނިކުފާނު ފާހަގަކުރެއްވިއެވެ. އެހެން ކަމުން، ރައްޔިތުންގެ ކަންކަމަށް އެފަދައިން ހުރަސްއަޅާ ބަޔަކު ކުރިއަށް އޮތް ފަސް އަހަރަށް މަޖިލީހަށް ހޮވުމާއިމެދު ރައްޔިތުން ވިސްނާލަންޖެހޭ ކަމަށް އެމަނިކުފާނު ވިދާޅުވިއެވެ. 

މިއާއެކު ރައީސް ވަނީ ރައްޔިތުންގެ މަޖިލީހަށް ރައްޔިތުން ހޮއްވަވާނީ ސަރުކާރުގެ ފަރާތުން ވާދަކުރައްވާ ކެންޑިޑޭޓުން ކަމާއިމެދު ޔަގީންކުރައްވާ ކަމަށެވެ. 

ރައްޔިތުންގެ މަޖިލީހުގެ އިއްޔެގެ ޖަލްސާގައި ސޮވެރެން ޑިވެލޮޕްމަންޓް ފަންޑާއި ބެހޭ ބިލް މަޖިލީހަށް ބަލައިގަތުމަށް ވޯޓަށް އެހުމުން، އެ ބިލު މަޖިލީހަށް ބަލައިގަތުމަށް ފެންނަ ކަމަށް ވޯޓު ލާފައިވަނީ އެންމެ މެންބަރެކެވެ. އެހެންކަމުން ބިލު ވަނީ މަޖިލީހަށް ބަލައި ނުގަނެ ބޭރުކޮށްލާފައެވެ.