މުދަލުން ބަރުކޮށްފައި އޮތް ކާގޯ ބޯޓެއް އެމެރިކާގެ ބަލްޓިމޯގެ މުހިންމު ބްރިޖެއްގައި ޖެހި، އެ ބްރިޖް ވެއްޓިއްޖެއެވެ.

ފްރާންސިސް ކީ ގެ ނަމުން ނަންދެވިފައިވާ މި ބްރިޖް ވެއްޓުނީ އެ ދިމާލުން ދަތުރުކުރި ކާގޯ ބޯޓެއްގެ އިންޖީނު ނިވި ކަރަންޓު ކެނޑުމާއި ގުޅިގެން ބޯޓު ކޮންޓްރޯލުން ނެއްޓުމުން، އޭގެ ކޮންޓްރޯލް ހޯދަން އުޅެނިކޮށް އެ ބްރިޖްގެ ތަބެއްގައި ޖެހިގެންނެވެ.

ބަރުދަނުގައި 95،000 ޓަނު އަދި ދިގުމިނުގައި 984 ފޫޓު ހުރި މި ބޯޓު ޖެހިފައިވަނީ ބްރިޖްގެ މެދު ތަނބުގައެވެ. މޭރީ ލޭންޑް ގެ ގަވަރުނަރު  ވެސް މޫ ވިދާޅުވީ މި ހާދިސާގައި ލިބުނު ގެއްލުން ކުޑަކުރެވުނީ ބޯޓަށް މައްސަލައެއް ދިމާވެ ކޮންޓްރޯލް ގެއްލިފައިވާ ކަމުގެ ރިޕޯޓް ލިބުމާ އެކު، އެ ސަރަހައްދުގެ އިދާރާތަކު ބްރިޖުން ވެހިކަލްތައް ހުސްކޮށް އެތަން ބަންދުކުރުމުން ކަމަށެވެ.

47 އަހަރުގެ މި ބްރިޖް ވެއްޓުނު ވަގުތު ބްރިޖްގައި ތިބީ ހަމައެކަނި ބްރިޖްގައި މަސައްކަތް ކުރާ މީހުން ކަމަށާއި، ބްރިޖް ވެއްޓުމާއިއެކު ވަގުތުން ރެސްކިއު މިޝަން އެއް ފެށި ކަމަށް ވެސް ގަވަރުނަރު ވިދާޅުވިއެވެ. 

މި މިޝަން ގައި 2 މީހަކު ސަލާމަތް ކުރި ނަމަވެސް މިހާރު މި މިޝަން ހުއްޓާލުމަށްފަހު އެގައުމުގެ ސިފައިން ވަނީ ނުފެނި ގެއްލިފައިވާ 6 މީހުން މަރުވެފައިވާ ކަމަށް އިއުލާން ކޮށްފައެވެ. ކޯސްޓްގާޑްގެ ރިއަރ އެޑްމިރަލް ޝެނަން ގިލްރެތު ވިދާޅުވީ، ފެނުގެ ފިނި ހޫނު މިނާއި، ހާދިސާ ހިނގުމަށްފަހު ހޭދަވި ވަގުތާއި މަސައްކަތްތެރިން ހޯދުމަށް ކުރިއަށްގެންދެވުނު ފުޅާ މިޝަން އަށްފަހު އެމީހުން ވަނީ މިހާރު ރެސްކިއު މޯޑުން ރިކަވަރީ މޯޑަށް ބަދަލުވެފައި ކަމަށެވެ.

ބްރިޖް ވެއްޓެން މެދުވެރިވި ހާދިސާ އަކީ އެކްސިޑެންޓެއް ކަމަށާއި މިއީ ޓެރަރިޒަމް ނުވަތަ އެނޫން ވެސް އެކަމާއި ގުޅުން ހުރި ހަމަލާ އެއް ނޫން ކަމަށް ކަމާ ބެހޭ ފަރާތްތަކުން އަންނަނީ ބުނަމުންނެވެ.

މި ބްރިޖަކީ ދުވާލެއްގެ މައްޗަށް 30،000 އާއި 35،000 ދެމެދުގެ އަދަދެއްގެ ކާރުތަކާއި ޓްރަކްތައް ދުއްވާ ބްރިޖަކަށް ވާއިރު، މި ބްރިޖް ވެއްޓުމާއި ގުޅިގެން މި އުޅަނދުތަކަށް ކައިރީގައި ހުރި ޓަނެލް ތަކުން ދަތުރު ކުރުމަށް ވަނީ މަޖުބޫރުވެފައެވެ. މިއާއި ގުޅިގެން ޓްރެފިކަށް ބޮޑެތި ބަދަލު ތަކެއް އަންނައިރު، މި ޓަނެލް ތަކުގައި ނުރައްކާތެރި ތަކެތި އުފުލުމަކީ މަނާކަމަށް ވާތީ، ކުރިން ބްރިޖުން މި ތަކެތި އުފުލި ޓްރަކް ތަކަށް ޖެހޭނީ ކުރިއަށްވުރެ ދިގު ރާސްތާއަކުން އެތަކެތި އުފުލާށެވެ.