ހުޅުމާލޭ ދެވަނަ ފިޔަވަހީގައި ހާމައަށް ހުރި ޓްރާންފޯމަރުތަކުގެ މައްސަލަ ހައްލުކުރައްވާނެ ކަމަށް ސެޓްލްކޯގެ މެނޭޖިން ޑިރެކްޓާ ހުސައިން ފަހުމީ ވިދާޅުވެއްޖެއެވެ.

ފަހުމީ މިހެން ވިދާޅުވީ، ހުޅުމާލޭ ދެވަނަ ފިޔަވަހީގެ ފްލެޓުތައް ކައިރީގައި އެއްވެސް ރައްކާތެރިކަމެއް ނެތި ޓްރާންސްފޯމަރުތައް ބަހައްޓާފައި ހުރުމުގެ ސަބަބުން ނުރައްކާތެރި ހާދިސާތައް ހިނގުމަށް މަގުފަހިވެ އަދި އެފަދަ ހާދިސާއެއް ހިނގާފައިވުމާ ގުޅިގެންނެވެ.

މިކަމަށް ޙައްލު ގެންނަވާނެކަމަށް ވިދާޅުވެ ފަހުމީ އެކްސްގައި މިއަދު ކުރެއްވި ޕޯސްޓެއްގައި ވިދާޅުވި ގޮތުގައި، މިއީ ކުރީ ސަރުކާރުން އިހުމާލުވެފައި ހުރި ކަންތައްތަކެއް ކަމަށެވެ.

Advertisement

އަދި މިފަދަ ހުރިހާ ކަމަކަށް އެޓެންޑްވެ އެކަންކަމަށް ޙައްލުހޯދައިދީ، ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމުގެ މަސައްކަތް ކުރަމުން ގެންދަނީ މި ސަރުކާރުންކަމަށް ވެސް ފަހުމީ ވިދާޅުވިއެވެ.

މިގޮތަށް ހާމައަށް ޓްރާންސްފޯމަރުތައް ހުރުމުގެ ސަބަބުން ވައްކަން ކުރާ މައްސަލަ ބޮޑުވެ، އެ ކަމުގެ ކަންބޮޑުވުންވެސް ވަނީ ފާޅުކުރައްވައި އެމްޑީ ފަހުމީ ވެސް ވަނީ އެއީ ވައްކަން ކުރާ މީހުންނަށް ވެސް ނުރައްކާތެރި ކަން ހަނދާންކޮށްދީފައެވެ.

ހުޅުމާލޭގެ އެކި ސަރަހައްދުތަކުން މިދިޔަ ހަފްތާގެ ބުރާސްފަތި ދުވަހުގެ ރޭ ފަތިހާއި އަދި ހުކުރު ދުވަހުގެ ރޭ ކަރަންޓު ކެނޑެން މެދުވެރިވި ސަބަބަކީވެސް ޓްރާންސްފޯމަރުތަކުން ވައްކަން ކުރުން ކަމަށާއި، މިފަދަ ކަންކަން ކުރަމުންގެންދާ ފަރާތްތައް ހުއްޓުވައި އެފަރާތްތަކަށް ފިޔަވަޅު އަޅައިދީ، ޓްރާންސްފޯމަރު ތައް ވަގަށް ނަގައިގެން ވިއްކާ، މިދަފަ ތަކެތި ގަންނަ ފަރާތްތަކަށް ފިޔަވަޅުއަޅައިދިނުމަށް ފަހުމީ ވަނީ ކަމާބެހޭ ފަރާތްތަކަށްވެސް ގޮވާލައްވާފައެވެ.

މީގެ އިތުރުން މިދިޔަ ހޮނިހިރު ދުވަހުރޭ ފަތިހު ވަނީ ހުޅުމާލެ ދެވަނަ ފިޔަވަހީގައި ހުންނަ ސްޓެލްކޯގެ ޓްރާންސްފޯމަރަކުން ވައްކަން ކުރަން އުޅެނިކޮށް، ކަރަންޓުގައި ޖެހި މީހަކުވެސް ވަނީ ނިޔާވެފައެވެ.