މާލެ، ހުޅުލެ އަދި ހުޅުމާލެ ކަރަންޓުގެ އެއްވިއުގައަކުން ގުޅާލުމަށް ޤާއިމްކޮށްފައިވާ ގްރޭޓަރމާލެ އިންޓަކަނެކްޝަން ގްރިޑްގައި ހިމެނޭ ކޭބަލް ވިއުގައިގެ މައްޗަށް ދަގަނޑު ޖަހައި އިސްތިހާރު ބޯޑުތައް އަދިވެސް ޖަހަމުންދާތީ ސްޓެލްކޯއިން ކަންބޮޑުވުން ފާޅުކޮށްފިއެވެ.

ގްރޭޓަރމާލެ އިންޓަކަނެކްޝަން ގްރިޑްގައި ހިމެނޭ ކޭބަލް ވިއުގައިގެ މަތީގައި އަދިވެސް ކެންޕެއިން ޕޯސްޓަރ ހަރުކުރަމުންދާތީ އެކަމާއި ކަންބޮޑުވުން ފާޅު ކުރައްވައި ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ރޭ އެކްސްގައި ކުރެއްވި ޕޯސްޓެއްގައި ވިދާޅުވީ އެ ކޭބަލް ވިއުގައިގައި ހިމެނޭ ކޭބަލްތަކަށް ގެއްލުމެއް ވެއްޖެނަމަ، އެ މަރާމާތު ކުރުމަށް ގިނަ ދުވަސްތަކެއް ނަގާނެ ކަމަށެވެ.

އަދި އޭގެ ސަބަބުން، ސްޓެލްކޯއިން މާލެ އަދި ހުޅުމާލެއަށް ދެމުންގެންދާ ކަރަންޓުގެ ޚިދުމަތް އެންމެ ފުރިހަމަ ގޮތުގައި ދިނުމަށް ބޮޑެތި ގޮންޖެހުންތަކާއި ކުރިމަތިލާންޖެހޭނެ ކަމަށްވެސް ވިދާޅުވިއެވެ.

Advertisement

އެހެންކަމުން އިސްތިހާރު ބޯޑުތައް ޖެހުމުގެ ހުއްދަ ދެއްވާ ފަރާތްތަކުން އެކަމަށް އިތުރަށް ސަމާލުވެ، އެކަންކަން ބައްލަވައި ކޭބަލް ވިއުގަ ރައްކާތެރިކޮށް ބޭއްވުމަށް ކުރެވެން ހުރި ހުރިހާ މަސައްކަތެއް ކޮށްދެއްވުމަށް ފަހުމީ ވަނީ އިލްތިމާސްކުރައްވާފައެވެ. 

މީގެ އިތުރުން، ކޭބަލް ވިއުގައިގެ މަތީގައި އިސްތިހާރު ބޯޑު ހަރުކުރުމަކީ، އޭގެ ސަބަބުން އެ މަސައްކަތް ކުރުމުގައި ހަރަކާތްތެރިވާ ފަރާތްތަކުގެ ފުރާނައަށްވެސް ނުރައްކާތެރިކަމެއް ކަން ފަހުމީ ފާހަގަކުރެއްވިއެވެ.

މާލެއާއި ހުޅުލޭ އަދި ހުޅުމާލޭގެ ކަރަންޓު އެއްވިއުގައަކުން ގުޅާލުމަށް ސްޓެލްކޯއިން ގާއިމުކޮށްފައިވާ "އިންޓަރކަނެކްޝަން" ވިއުގައިގައި ހިމެނޭ ކޭބަލް މައްޗަށް ދަނގަޑުޖެހުމާއި އިސްތިހާރު ބޯޑުތައް ބަހައްޓައި، ގެއްލުންދެމުންދާތީ، އެކަން ނުކުރުމަށް ސްޓެލްކޯއިން މީގެ ކުރިންވެސް ވަނީ އިލްތިމާސް ކޮށްފައެވެ.