އަނެއްކާވެސް މުޙްޔިއްދީން ސުކޫލްގެ ދަރިވަރުން، ޣައްޒާގެ ރައްޔިތުންނަށް އެހީ ފޯރުކޮށްދީފިއެވެ.

އައިއޭސީ އިން ހާމަ ކުރެއްވި ގޮތުގައި މުޙްޔިއްދީން ސުކޫލުގެ ދަރިވަރުން އިސްނަގައިގެން މިއަދު ވަނީ ޣައްޒާގެ ރައްޔިތުންނަށް 50000 ރުފިޔާ ހަދިޔާ ކޮށްފައެވެ.

ސުކޫލު ދަޢުރަކީ ކުދިންގެ ހިތުގައި އިންސާނީ ލޯބި އަށަގަންނަ އެންމެ މުހިންމު މަރުޙަލާ ކަމަށްވާއިރު، ޓީޗަރުންނާއި ބެލެނިވެރިންގެ އެއްބާރުލުން މިފަދަ ޙަރާކަތްތަކުގައި ލިބުމަކީ، ކުދިންނަށް ލިބޭ އިތުރު ހިއްވަރެއް ކަމަށްވެސް އައިއޭސީއިން ވިދާޅުވެފައި ވެއެވެ.

Advertisement

މުޙްޔިއްދީން ސުކޫލުގެ އިތުރުންވެސް، ދިވެހިރާއްޖޭގެ އެކިއެކި ސުކޫލްތަކާއި ޖަމާޢައްތަކުން ދަނީ، ޣައްޒާގައި ޙާލުގަިއ ޖެހިފައިވާ ރައްޔިތުންނަށް އެހީތެރިކަން ފޯރުކޮށްދެމުންނެވެ. 

އެ ގޮތުން މި ރަމަޟާންމަހުވެސް ދިވެހިންގެ އެހީއާއެކު ކޮންމެ ދުވަހަކުވެސް، 3000 އިފްޠާރު ޕެކް ދަނީ ޣައްޒާއަށް ފޯރުކޮށްދެމުންނެވެ. އައިއޭސީގެ އެދުމަކީ، ހުއްޓުމެއްނެތި، ޣައްޒާގެ ރައްޔިތުންނަށް އެހީ ފޯރުކޮށްދެމުން ގެންދިޔުމަށެވެ.

ނިރުބަވެރި އިސްރާއީލުން ފަލަސްތީންގެ ޣައްޒާއަށް ދެމުންގެންދާ ހަމަލާތަކުގެ ސަބަބުން އެތައް ބަޔަކު ޝަހީދުވެ ޒަހަމްވެފައިވާއިރު، ކާނެ އެއްޗެއް ނުލިބި، ޣައްޒާގެ ރައްޔިތުން ދަނީ ވަރަށް ބޮޑު ވޭނެއް ތަހައްމަލު ކުރަމުންނެވެ. ހައިހޫނު ކަމުގެ ސަބަބުން ޣައްޒާގެ ކުޑަކުދިންނާއި ބޮޑެތި މީހުންވެސް ދަނީ ދުނިޔެ ދޫކުރަމުންނެވެ.