ލުބުނާނުގެ ދެކުނުގައި ޙަރަކާތްތެރިވާ ހަނގުރާމަވެރި ޖަމާއަތުގެ ރޮކެޓް ޔުނިޓުގައި އިސްކޮށް ހަރަކާތްތެރިވި ހިޒްބުاللهގެ އިސް އޮފިޝަލަކު މިދިޔަ ހުކުރު ދުވަހު މަރާލާފައިވާ ކަމަށް އިޒްރޭލުން ބުނެފިއެވެ.

އިސްރާއީލުގެ އަސްކަރިއްޔާއިން ބުނީ ހިޒްބުاللهގެ ރޮކެޓް ޔުނިޓްގެ ޑެޕިއުޓީ ހެޑްގެ ގޮތުގައި ސިފަކުރާ އަދި އިޒްރޭލުގެ އާންމުންނާ ދެކޮޅަށް ހަމަލާތައް ދީ ރޭވުމުގައި އިސްކޮށް ހަރަކާތްތެރިވި އަލީ އަބްދުލް ހަސަން ނާއިމަށް ހަމަލާދީ މަރާލާފައިވާ ކަމަށެވެ.

ލުބުނާނުގެ އޮފިޝަލުން ބުނި ގޮތުގައި މި ހަމަލާ އަމާޒުކޮށްފައި ވަނީ ޓަޔަރު ކައިރީގައި އޮންނަ ބަޒޫރިއްޔާ އަވަށުގައި ހުންނަ ނާއިމްގެ ވެހިކަލަށެވެ. އިސްރާއީލުގެ ބޮމުގެ ހަމަލާގައި ނާއިމް ހިމެނޭ ގޮތަށް ހިޒްބުالله ޖަމާއަތުގެ ހަތް މެމްބަރަކު މަރުވިކަން ކަށަވަރުކޮށްދިން ނަމަވެސް، އެ ހާދިސާ ހިނގި ވަގުތެއް އަދި ތަނެއް ހާމަކޮށްފައެއް ނުވެއެވެ.

Advertisement

މިހާދިސާ ހިނގާފައި މިވަނީ ޣައްޒާގައި ތިބި ފަލަސްތީނުގެ ހަނގުރާމަވެރިންނާ އެއްބައިވަންތަވުމުގެ ގޮތުން ފާއިތުވި ހަފުތާތަކުގައި އިސްރާއީލުގެ އުތުރުގެ ސަރަހައްދުތަކަށް ހަމަލާދެމުން އަންނަ ހިޒްބުاللهގެ ރޮކެޓް ގާބިލްކަން ދަށްކުރުމަށް އިސްރާއީލުން މަސައްކަތް ކުރަމުންދާދަނޑިވަޅެއްގައެވެ.

ލުބްނާނުން ނުކުންނަ ކޮންމެ ހަމަލާއެއްގެ އަގެއް އެމީހުންނަށް ދައްކާނަން،" ހުކުރު ދުވަހު އުތުރުގެ ސަރަހައްދަށް ވަޑައިގަތުމަށް ފަހު އިޒްރޭލުގެ ޑިފެންސް މިނިސްޓަރު ޔޯވް ގަލަންޓް އިންޒާރު ދެއްވި އެވެ.

މިދިޔަ އޮކްޓޯބަރު މަހުގެ ހަތްވަނަ ދުވަހުން ފެށިގެން ޣައްޒާގައި ހަމާސްއާއި އިސްރާއީލާ ދެމެދު ހަމަލާތައް ބަދަލުކުރެވެމުންދާއިރު، ހިޒްބުالله އިން ވަނީ އިސްރާއީލާ އެކު ކޮންމެ ދުވަހަކު ވެސް ބޯޑަރު ހުރަސްކޮށް ބަޑީގެ ހަމަލާތައް ބަދަލުކޮށްފައެވެ.

އިސްރާއީލުން ދެމުންދާ ހަމަލާތަކުގައި ލުބްނާނުގައި ނުރައްކާތެރި ހަމަނުޖެހުންތައް ވަރަށް ބޮޑަށް އިތުރުވެފައިވާ އިރު، އެހަމަލާތަކުގައި މިހާތަނަށް 347 މީހުން ވަނީ މަރުވެފައެވެ. އޭގެ ތެރޭގައި ގިނައީ ހިޒްބުالله ގެ ހަނގުރާމަވެރިންނެވެ. އަދި އެހަމަލާތަކުގައި އާންމުންގެ 68 މީހުން މަރުވެފައިވާ ކަމަށް މޮނިޓަރިން ގްރޫޕްތަކުން ބުނެއެވެ.

އިޒްރޭލުން ބުނީ ހިޒްބުاللهގެ ހަމަލާތަކުގައި އެގައުމުގެ 18 ސިފައިންނާއި އިތުރު އާންމުން މަރުވެފައިވާ ކަމަށެވެ.

ލުބުނާނުގެ ދެކުނުގައި ހުންނަ އދ.ގެ ސުލްހަ ބަލަހައްޓާ ފައުޖުން ބުނީ އިޒްރޭލުގެ ހަމަލާތަކުގައި ޢާއްމުންގެ އިތުރުން ލުބުނާނުގައި ހަރަކާތްތެރިވަ މެޑިކަލް އޮފިޝަލުން ތަކެއްވެސް މަރާލުމާ ގުޅިގެން ވަރަށް ބޮޑަށް ނުތަނަވަސްވެފައިވާ ކަމަށެވެ.

ވައިޓް ހައުސްއިން އިޒްރޭލާއި ލުބްނާނަށް ވެސް ގޮވާލާފައި ވަނީ ހަމަނުޖެހުން އުފެދިފައިވާ ސަރަހައްދުގައި ހަމަޖެހުން ގާއިމުކުރުމަށް އިސްކަން ދިނުމަށެވެ.

އީރާނުގެ ތާއީދު އޮންނަ ހިޒްބުالله އިން ބުނީ އެ ޖަމާއަތުގެ ރޮކެޓް ހަމަލާގެ މަގުސަދަކީ ޣައްޒާއަށް އިސްރާއީލުން ދެމުންދާ ވަރުގަދަ ބޮމުގެ ހަމަލާތަކާ ކުރިމަތިލާން ޖެހިފައިވާ ހަމާސް އާއި ފަލަސްތީނަށް އެހީތެރިކަން ފޯރުކޮށްދިނުން ކަމަށެވެ.