މި އަހަރުގެ މާރިޗް މަހުގެ ކަރަންޓާއި ފެނުގެ ޚިދުމަތަށް ބިލުކުރާއިރު ކޮންމެ ޑޮމެސްޓިކް ކަރަންޓު އަދި ފެން މީޓަރަކުން އާންމު މަހަކާ އެއްވަރަށް ބިލްކުރުމަށް ނިންމާފައިވާކަމަށް ޔުޓިލިޓީ ރެގިއުލޭޓަރީ އޮތޯރިޓީއިން ބުނެފިއެވެ.

މި ގޮތަށް ބިލްކުރާއިރު، ޢާންމު މަހެއްގައި ކަރަންޓާއި ފެނަށް ހޭދަކުރި އެވްރެޖް މިންވަރަށް ބަލާފައިވާނީ، ވޭތުވެ ދިޔަ އަހަރުގެ ރަމަޟާން މަސް ފަދަ ޑިމާންޑް މަތި މަސްތައް އުނިކުރުމަށްފަހު ކަމަށް ޔުޓިލިޓީ ރެގިއުލޭޓަރީ އޮތޯރިޓީން ވަނީ ހާމަކޮށްފައެވެ.

ޑޮމެސްޓިކް ކަސްޓަމަރަށް ބިލްކުރައްވާއިރު މި އަހަރުގެ މާރިޗް މަހުގެ ބިލަށް އަރާ އަދަދާއި، ރަމަޟާން މަހުގެ ޑިސްކައުންޓުގެ ގޮތުގައި ދެވޭ އަދަދާއި، އާންމު މަހެއްގައި އެ ކަސްޓަމަރަކު ބޭނުންކުރި އެވަރެޖު އަދަދު ބިލުން ފެންނަގޮތަށް ހިމަނުއްވަން ވަނީ، ޔުޓިލިޓީ ރެގިއުލޭޓަރީ އޮތޯރިޓީއިން، ހުރިހާ އާންމު ޚިދުމަތްތައް ފޯރުކޮށްދޭ ކުންފުނިތަކަށް އަންގަވާފައެވެ.

Advertisement

މި ނިންމެވުން މި ގޮތަށް ނިންމަވާފައިވަނީ، ރަމަޟާން މަހުގެ ޑޮމެސްޓިކް ކަރަންޓު ބިލަށް ރައްޔިތުން ބޮޑު ހޭދައެއް ކުރައްވަން ޖެހޭތީ، މި މައްސަލަ ޙައްލުކޮށްދެއްވުމަށް ރައީސް ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދުފުޅުގެ މަތިންނެވެ.

ރަމަޟާން މަހަކީ ޢާންމު މަސްމަހާ އަޅާބަލާއިރު ކަރަންޓާއި ފެން ބޭނުންކުރާ މިންވަރު ވަރަށް ބޮޑަށް އިތުރުވާ މަހެކެވެ. ވަކިން ޚާއްސަކޮށް، މި އަހަރުގެ ރަމަޟާން މަސް، ހޫނު ގަދަ ދުވަސްތަކާ ދިމާވުމުން ކަރަންޓަށް ރައްޔިތުން ކުރަންޖެހޭ ހޭދަ ނުހަނު ބޮޑެވެ.