އަލް ޢަސްރުން އިސްލާމިކް މިނިސްޓްރީ އާއި ގުޅިގެން މި ރަމަޟާން މަހުގެ ފަހު ދިހައެއްގައި ކުރިއަށް ގެންދާ ޝެއިހް އިބްރާހިމް މެންކުގެ ސިލްސިލާ ދަރުސްތަކުގައި މިއަދު އަލި އަޅުވާލާނީ ރަސޫލާ ޞައްލަالله ޢަލައިހި ވަސައްލަމްގެ މަދީނާއަށް ހިޖުރަ ކުރެއްވި ދަތުރުފުޅުގެ މައްޗަށް ކަމަށް އަލް އަސްރުން ބުނެފިއެވެ.
ރަމަޟާން މަހުގެ ފަހު ދިހައެއްގެ ކޮންމެ ދުވަހަކުވެސް އަސުރު ނަމާދަށްފަހު އައްޝައިޚް އިބްރާހިމް މެންކު، ދެއްވާ މި ސިލްސިލާ ދަރުސްތައް އޮންނަނީ ސަލްމާން މިސްކިތުގައެވެ.
އިނގިރޭސި ބަހުން ދެއްވާ މި ސިލްސިލާ ދަރުސްތަކުގައި މިފަހަރު ޝެއިޚް އަލިއަޅުވާލައްވަނީ އަހަރެމެންގެ ލޮބުވެތި ރަސޫލާ މުހައްމަދު (ޞޢވ) ގެ ހަޔާތްޕުޅުގައި އެކަލޭގެފާނަށް ކުރިމަތިލައްވަން ޖެހި ވަޑައިގެންނެވި ހިތާމަތަކާއި އެކަން ކަމާއި އެކަލޭގެފާނު ކުރިމަތިލެއްވި ގޮތުގެ މައްޗަށް ކަމަށް އަލް އަސްރުން ވޮއިސް އަށް ވަނީ މައުލޫމާތު ދީފައެވެ.
އަދި މީގެ އިތުރުން ސުންނަތުގެ އަލީގައި އަހަރެމެންގެ ދިރިއުޅުމުގައި ދިމާވާ އެކިއެކި ހިތާމަތަކާއި ކުރިމަތިލާނެ ގޮތަށްވެސް ދަރުސް ތަކުގައި އަލިއަޅުވާލައްވާނެ ކަމަށް އަލް އަސްރުން ބުނެއެވެ.
އެގޮތުން އިއްޔެ ދެއްވި ދަރުސްގައި ޝެއިޚް އަލިއަޅުވާލައްވާފައި ވަނީ “ޠާއިފްގެ ދަތުރުފުޅު” ގެ މައްޗަށެވެ.
ބެންކް އޮފް މޯލްޑިވްސް އިސްލާމިކްގެ ސްޕޮންސަރޝިޕާއިއެކު ކުރިއަށް ގެންދާ މި ދަރުސްތަކުގެ މީޑިއާ ޕާޓްނަރަކީ “ވޮއިސް” އެވެ. އަދި މި ހުރިހާ ދަރުހެއް ވޮއިސް މެދުވެރިކޮށް ލައިވް ކުރާނެއެވެ.
ޝެއިޙް އިބްރާހިމް މެންކް އަކީ ސަޢުދިއަރަބިއްޔާގެ މަދީނާ ޔުނިވަރސިޓިގެ ގްރެޖުއޭޓެކެވެ. ޝެއިޙް އިބްރާހިމް މެންކް ވަނީ މީގެ ކުރިންވެސް ދެފަހަރު މަތިން މިފަދަ ސިލްސިލާ ދަރުސް ރާއްޖޭގައި ދެއްވާފައެވެ.
އެގޮތުން އަލް ޢަސްރުން އިންތިޒާމް ކޮށްގެން 2019 ގައި "ދަ ލޯޑް އޮފް ދަ ވޯރލްޑްސް" މި ނަމުގައި ޝައިހް އިބްރާހިމް މެންކް ގެ ދަރުސް ސިލްސިލާއެއް ބާއްވާފައިވާއިރު، 2022 ވަނަ އަހަރުވެސް އެ ޖަމިއްޔާއިން އިންތިޒާމް ކޮށްގެން "ލިވިންގ ވިތް ޤުރްޢާން" ނަމުގައި ސިލްސިލާ ދަރުސް ތަކެއް ކުރިއަށް ގެންގޮސްފައި ވެއެވެ.
ޝައިހް އިބްރާހިމް މެންކް އަކީ ޒިމްބާބްވޭގެ މަޝްހޫރު ދާއީ މުފްތީ އިސްމާއިލް މެންކް އަށް ބޮޑުބޭބެ ވިދާޅުވާ ބެފުޅެކެވެ.
Advertisement
This content is created and paid for by advertisers and does not involve Voice Journalists
