މިހާރުގެ އިދިކޮޅު ޕާޓީ، އެމްޑީޕީގެ މެޖޯރިޓީ މަޖިލީހުގެ އޮވެ، އެ ސަރުކާރުގައި، ދީނަށް ހަޖޫޖަހައި، ދީނަށް ކުަޑައިމީސްކުރި ކުރުން ހަނދާން ނައްތާލައިގެން ނުވާނެ ކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.
ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ޕީޕީއެމް/ޕީއެންސީގެ ފަރާތުން ގަމު ދާއިރާއަށް ވާދަ ކުރައްވާ ކެންޑިޑޭޓްގެ ރޭ ބޭއްވުނު ކެންޕެއިން ޖަލްސާގައި ވާހަކަ ދައްކަވަމުން ރައީސް މުޢިއްޒުވަނީ ކުރީ ސަރުކާރުގައި، މިހާރުގެ އިދިކޮޅު އެމްޑީޕީގެ މެޖޯރިޓީ ރައްޔިތުންގެ މަޖިލީހުގައި އޮވެ، ދިވެހިރާއްޖެއަށް ގެއްލުންތައްވާގޮތަށް ހިނގާފައިވާ ކަންކަމުގެ މައްޗަށް އަލިއަޅުވާ ލައްވައި އެކަންކަން ހަނދާން ނައްތަވާލައްވައިގެން ނުވާނެ ކަމަށް ވިދާޅުވެފައެެވެ.
އެގޮތުން، އެމަނިކުފާނު ވިދާޅުވީ، ދިވެހި ގައުމު މިއަދު މިހާލުގައި އޮތީ ކުރީ ސަރުކާރުން ހައްދެއްނެތި ފައިސާ ޗާޕްކުރުމުންކަން ހަނދާން ނައްތާލައިގެން ނުވާނެ ކަމަށެވެ. އެ ސަރުކާރުން 8000 މިލިއަން ރުފިޔާ ޗާޕުކޮށް ޑޮލަރުގެ އަގު މައްޗަށް ގެނެސް ދިވެހި ފައިސާގެ އަގު ދަށްކޮށްލި ކޮށްލުން ހަނދާން ނައްތާލައިގެން ނުވާނެ ކަމަށް ރައީސް ވިދާޅުވިއެވެ.
އަޅުގަނޑުމެންގެ ހަނދާނަށް ގެންނަންޖެހޭ މިހާރު މިއޮތް މަޖިލީހުގެ މެޖޯރިޓީ އޮވެ، އެބޭފުޅުންގެ ޕާޓީން، އަދި އެބޭފުޅުންގެ ސަރުކާރު އޮތް އިރުގައި، ދީނަށް ހަޖޫޖަހައި، ދީނަށް ކުަޑައިމީސްކުރި ކުރުން. އެކަން ތަކުރާރު ކުރުމަށް، އެ މިސްރާބަށް މިގައުމު ދެން ނުދިޔުމަށްޓަކައި މި މަސައްކަތް (މަޖިލިސް މެޖޯރިޓީ) ކުރަންޖެހޭ. އެމްޑީއެން ރިޕޯޓް ނެރެގެން، އަޅުގަނޑުމެންގެ ރަސޫލާ ޞޢވ އަށާއި އަޅުގަނޑުމެންގެ އަގީދާގެ މައިގަނޑު މަސްދަރުތަކަށް ހަޖޫޖަހައި، އެބޭފުޅުން ހެއްދެވި ރިޕޯޓް، އަދި ހެއްދެވީކީ އެކަންޏެއް ނޫން އަޅުގަނޑުމެންގެ ބައިތުލްމާލުން، މަތީ މަގާމުތަކުގައި އެބޭފުޅުންނަށް މުސާރަ ދެމުން ފަސް އަހަރު ނިންމައި ލެއްވި ބައެއްގެ ވާހަކަ މި ދައްކަނީ
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
އެހެންކަމުން ދިވެހިންގެ ވިސްނުން އިސްކޮށް، ދިވެހިންގެ ރާއްޖެއަށް ގައުމު ގެންދިޔުމުގެ ވިސްނުންހުރި ފަރާތްތަށް މަޖިލީހަށް ހޮވުމަކީ ނުހަނު މުހިންމު ކަމެއް ކަމުގައި ރައީސުލްޖުމްހޫރިއްޔާ ފާހަގަކުރެއްވިއެވެ.
އެހެނީ ގާނޫނުތައް ހަދައި، ގާނޫނު ބަދަލުކޮށް، ކެބިނެޓަށް ރުހުން ދިނުމުގެ ކަންކަންވެސް ކުރަނީ ރައްޔިތުންގެ މަޖިލީހުން ކަން އެމަނިކުފާނު ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
