ބައެއް ފަރާތްތައް ދައްކާ ވާހަކަތަކުން އިހުސާސް ވަނީ ގައުމުގައި ހަމަޖެހުން ބޭއްވުމަށް ބޭނުންނުވާކަން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ޕްރޮގްރެސިވް ކޮންގްރެސް ކޯލިޝަންގެ ކެމްޕެއިންނަށް ރޭ ހިޔާ ސަރަހައްދުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، އެމަނިކުފާނު ވެވަޑައިގެންނެވި އެންމެ މުހިންމު އެއް ވައުދަކީ ގައުމުގައި ހަމަޖެހުން ގާއިމް ކުރެއްވުން ކަމަށެވެ. 

ރައީސް ވިދާޅުވި ގޮތުގައި ރާއްޖެއަކީ ވެރިކަންތައް ބަދަލުވެގެން އަންނަ ހިނދު ބަދަލު ހިފުމުގެ ރޫހެއް އޮތް ގައުމެއް ކަމަށާ، ކުރިން ވެރިކަން ކުރެއްވި ބޭފުޅުންނާއި ސިޔާސީ ބޭފުޅުން ޖަލަށް ލުމުގެ ނުބައި އޮއިވަރެއް އެނބުރެމުން ދާ ގައުމެކެވެ.

ނަމަވެސް އެ ބަދަލު ހިފުމުގެ ރޫހު ނައްތާލައްވަން ޖެހޭ ކަމަށާ މި ގައުމަކީ ހަމަޖެހޭ ގައުމެއްގެ ގޮތުގައި ބޭއްވުމަށް މަސައްކަތްޕުޅު ކުރައްވަމުންގެންދަވާ ކަމަށް ރައީސް ވިދާޅުވިއެވެ.

ރައީސް ވިދާޅުވީ، ބަދަލު ހިފުމުގެ ރޫހު ނުގެންގުޅުއްވައި، ގައުމުގައި ހަމަޖެހުން ގާއިމް ކުރެއްވުމަށް އެމަނިކުފާނު މަސައްކަތް ކުރައްވަމުންދާއިރުވެސް، ބައެއް ބޭފުޅުންގެ ވާހަކަތަކުން ގައުމުގައި ހަމަޖެހުން ބޭއްވުމަށް ބޭނުންނުވާކަމުގެ އިހްސާސްވެވަޑައިގަންނަވާ ކަމަށެވެ. 

ރައީސް މުޢިއްޒު ވިދާޅުވީ ބަދަލު ހިފުމުގެ ރޫހުގައި ތިބި ބައެއްގެ އަތްމައްޗަށް މަޖިލިސް ދޫކޮށްލާފިއްޔާ އެބޭފުޅުން ބަދަލު ހިފުމަށްޓަކައި ގައުމު ހަމަނުޖެހުމުގެ ތެރެއަށް ގެންދަވާނެ ކަމަށެވެ. އަދި ދޭދޭ އަފްރާދުންގެ މެދުގައި ހިތުގައި ހުރި ހިޔާލުތަފާތުވުންތަކާއެކު މައާފު ކުރުމާއެކު ގައުމީ ވިސްނުން އިސްކުރަންޖެހޭ ކަމަށް ވެސް ރައީސް ވިދާޅުވިއެވެ.