އަހަރުތައް ބޭކާރުވާގޮތަށް މަޖިލީހަށް މެންބަރުން ހޮވުމަކީ ކޮށްގެންވާނެ ކަމެއްނޫން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ސަރުކާރުގެ ފަރާތުން ވިލިނގިލީ ދާއިރާއަށް ކުރިމަތިލައްވާ ކެންޑިޑޭޓު ޔަޒްމީދު އަހުމަދުގެ ކެމްޕެއިން ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ،  ކުރިއަށް އޮތް އިންތިހާބަކީ ރަށްތަކާއި ސިޓީތަކުގެ ތަރައްގީއަށް ކުރަންހުރި މަސައްކަތް ތަކުގައި ސަރުކާރަށް އެއްބާރުލުންދޭނެ މީހުން ހޮވަންވީ އިންތިޚާބެއް ކަމަށެވެ. އަދި އެކަމަށްޓަކައި އެންމެން އެކަތިގަނޑަކަށްވެ އެއްބައިވާންޖެހޭ ކަމަށެވެ. 

މިއާއެކު ރައީސް ޑރ. މުޢިއްޒު ވިދާޅުވީ ރައްޔިތުންނަށް އެމަނިކުފާނު ވެވަޑައިގެންނެވީ ނަތީޖާ ނެރޭނެ ސަރުކާރެއް ގާއިމް ކުރައްވާނެ ކަމުގެ ވަޢުދު ކަމަށެވެ. އަދި އަމާޒު ހުރީ ނަތީޖާ ނެރެވޭ ސަރުކާރެއް ޤާއިމްކޮށް ރައްޔިތުންނަށް ބޭނުންވާ ކަންކަން ކޮށްދިނުމަށް ކަމަށް ވިދާޅުވިއެވެ.

ރައީސް މުއިއްޒު އިތުރަށް ވިދާޅުވީ، ގައުމުގެ މަސްލަތު އިސްކޮށް ދާއިރާގެ ރަށްތަކުގެ މަސްލަހަތު އިސްކުރަންޖެހޭ ކަމަށެވެ. އަދި އެއްކޮށް އިސްކޮށްގެން އެކުވެރިކަމާއެކީގައި މަސައްކަތް ކޮށްގެން އިންތިހާބު ކާމިޔާބު ކުރުން މުހިންމު ކަމަށްވެސް ވިދާޅުވިއެވެ. އެހެން ނޫންނަމަ ސަރުކާރަށް ލިބެންހުރި މުހިންމު ގޮނޑިތަކެއް ގެއްލިގެން ދިޔުމުގެ ފުރުސަތު އެބައޮތް ކަމަށްވެސް ވިދާޅުވިއެވެ.

އެހެންކަމުން އެކަންކަމަށް ވިސްނަވައި، ކުރިއަށް އޮތް ފަސް އަހަރުގެ ތަރައްގީއާއި ދަރިންގެ މުސްތަގުބަލަށްޓަކައި ކުރާ ކަމެއް ގޮތުގައި ދެކިގެން  އެންމެން އެކުވެގެން، ސަރުކާރުގެ ކެންޑިޑޭޓުންނަށް ވޯޓު ދެއްވުމަށް ރައީސް ވަނީ އެދިވަޑައިގެންފައެވެ. 

މިއާއެކު ރާއްޖޭގައި އޮތީ މަޖިލީހާ ނުލައި ސަރުކާރު ހިންގޭނެ ނިޒާމެއް ނޫންކަން ފާހަގަކުރައްވަމުން ރައީސް ވިދާޅުވީ، މި އިންތިހާބުގައި އެންމެން އެކަތިކަނޑަކަށް ވެގެން މަސައްކަތް ކުރަން ޖެހޭ ކަމަށް އެމަނިކުފާނު ވިދާޅުވުއެވެ.