އަލް އަޤްޞާ މިސްކިތުގައި ނަމާދު ކުރަނިކޮށް ކަރުނަގޭސް ޖަހައިފިއެވެ.

ރޭގައި ފަލަސްތީނުގެ އަލް އަޤްޞާ މިސްކިތުގައި، މީހުން ނަމާދު ކުރަން ތިއްބާ، ނިރުބަވެރި އިސްރާއީލުން ވަނީ ޑްރޯން ބޭނުން ކޮށްގެން ކަރުނަ ގޭސް ޖަހާ، މިސްކިތުން ނުކުތުމަށް މަޖުބޫރުކޮށްފައެވެ.

އިސްރާއީލުން އަލް އަޤްޞާ މިސްކިތަށް ކަރުނަ ގޭސް ޖަހާފައިވަނީ، ރެއަކީ ރަމަޟާންމަހުގެ 27 ވިލޭރޭ ކަމުން، ލައިލަތުލް ޤަދްރި ވިލޭރޭ ހޯދުމަށް, ވަރަށް ގިނަ އަދަދެއްގެ ބަޔަކު ރޭ އަޅުކަން ކުރުމަށް މިސްކިތުގައި ތިއްބައެވެ. މިއީ މިއަހަރުގެ ރަމަޟާންމަހު އިސްރާއީލު ސިފައިން އަލް އަޤްޞާ މިސްކިތަށް ކަރުނަ ގޭސް ޖަހާ ދެވަނަ ފަހަރެވެ.

ޑްރޯންތައް ބޭނުންކޮށްގެން ކަރުނަ ގޭސް ޖެހުމުން، މިސްކިތުގަ ތިބި މީހުން، ބޭރަށް ނުކުތްތަން، މީސްމީޑިޔާގަ ދަޢުރުވަމުންދާ ވީޑިއޯތަކުން ފެނެއެވެ. މަންޒަރު ދުށް ބައެއް މީހުން ބުނާ ގޮތުގައި އިސްރާއީލުގެ ސިފައިން، ރޭ އަލް އަޤްޞާ މިސްކިތުގައި އަޅުކަންކުރަން ތިބި ބައެއް މީހުންގެ ގައިގައި ދަނޑިބުރިން ތަޅަމުން ދިޔައެވެ.

މި ހާދިސާއަށްފަހު ރޭގައި، އަލް އަޤްޞާ މިސްކިތުން 16 މީހަކު ވަނީ ހައްޔަރުވެސް ކޮށްފައެވެ. މީގެ އިތުރުން، ރޭ އިސްރާއީލު ސިފައިން ވަނީ އަލް ޚަލީލް އަވަށުގައި ރެއިޑްޖަހާ މީހަކު ހައްޔަރު ކޮށްފައެވެ. އޮކްޓޯބަރު މަހުގެ 7 ވަނަ ދުވަހުން ފެށިގެން މިއަދާ ހަމައަށް، އިސްރާއީލުން ވަނީ، ފަލަސްތީނުގެ ހުޅަނގު އައްސޭރިން، 8000 އަށް ވުރެ ގިނަ މީހުން ހައްޔަރު ކޮށްފައެވެ.