ޕީއެންއެފް އުފައްދާ ޖަލްސާ، މާދަމާ ރޭ ބޭއްވުމަށް ނިންމަވައިފިއެވެ.

ކުރީގެ ސައިންސް މިނިސްޓަރު މުޙައްމަދު މަލީހު ޖަމާލު މިއަދު އެކްސްގައި ކުރެއްވި ޕޯސްޓެއްގައި ވިދާޅުވެފައި ވަނީ ރައީސް ޔާމީނުގެ ޕާޓީ ޕީއެންއެފް އުފެއްދުމަށް ބާއްވާ ތާރީޚީ ޖަލްސާ އަންގާރަ ދުވަހުގެ ރޭ 9:15 ގައި އޮންނާނެ ކަމަށެވެ.

މި ޖަލްސާ ބޭއްވުމަށް ހަމަ ޖެހިފައިވަނީ ޣިޔާސުއްދީން ސުކޫލު ހޯލުގައެވެ.

މީގެ ކުރިން ޕީއެންއެފް އުފައްދާ ޖަލްސާ ބާއްވާ ގޮތަށް ހަމަޖެހުނީ މިރޭ އެވެ. އެހެން ނަމަވެސް އިދާރާ ތަކުން ހުއްދ ނުލިބޭ ކަމަށްބުނެ ޖަލްސާ މާދަން ރެއަށް ފަސްކުރި ކަމަށް މިއަދު މަލީހު ވިދާޅުވެފައިވެއެވެ.

 މި ޖަލްސާގައި ކުރީގެ ރައީސް ޔާމީން އަބްދުލްގައްޔޫމްވެސް ބައިވެރި ވަޑައިގަންނަވާއިރު، އެ މަނިކުފާނު ޖަލްސާގައި ބައިވެރިވެ ވަޑައިގެންނެވުމުގެ ހުއްދަ ނުދެއްވާ ކަމަށް ކަރެކްޝަނުން ބުނެފައިވެއެވެ.

މިދިޔަ ސަރުކާރުގެ ފަހުކޮޅު ރައީސް ޔާމީނުގެ ބަންދަށް ބޮޑެތި ލުއިތަކެއް ދެއްވާ ގޭ ބަންދަށް ބަދަލުކޮށްފައިވާއިރު، ލުއިތަކާއެކު ހުއްދަ ދެވިފައިވަނީ ޢާންމު މެންބަރެއްގެ ގޮތުގައި ސިޔާސީ ހަރަކާތްތަކުގައި ބައިވެރިވުމަށެވެ. އެހެންކަމުން ޕޯޑިއަމް ތަކުގައި ވާހަކަ ދެއްކުމުގެ ހުއްދައެއް ނޯވެއެވެ.

ޕީއެންއެފްގެ ނަމުގައި ސިޔާސީ ޕާޓީއެއް އުފެއްދުމުގެ ހުއްދަ ކުރީގެ ރައީސް ޔާމީނުގެ ދޮށީ ދަރިކަލުން، ޒޭން އަބްދުالله ޔާމީނަށް، އިލެކްޝަން ކޮމިޝަނުން ދެއްވާފައިވަނީ މިދިޔަ ނޮމެބްރު މަހު 29 ގައެވެ. އަދި ޕާޓީ އުފެއްދުމަށް ބާއްވާ ޚާއްސަ ޖަލްސާ ބޭއްވުމަށް ހުއްދަ ދީފައިވަނީ މިދިޔަ ބުރާސްފަތި ދުވަހުއެވެ.