މި މަހުގެ 21 ވަނަ ދުވަހު އޮންނަ ރައްޔިތުންގެ މަޖިލީހުގެ އިންތިހާބުގައި، ސަރުކާރާއި ރައްޔިތުންގެ ތަރައްގީއަށް ފުރުސަތު ފަހިކޮށް ދޭނެ ކެންޑިޑޭޓުން އިންތިހާބު ކޮށްދެއްވައިފިނަމަ ނަތީޖާ ނެރެދީ، އައްޑޫ ސިޓީގެ ރައްޔިތުން ބޭނުންވާ ތަރައްގީ ހޯއްދަވައިދެއްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ވިދާޅުވެއްޖެއެވެ.
ރައީސް ޑރ.މުޢިއްޒު މިފަދައިން ވިދާޅުވީ، ރޭގައި، މަރަދޫ ދާއިރާއަށް ވާދަކުރައްވާ ޕީޕީއެމް/ޕީއެންސީ ކެންޑިޑޭޓްގެ ކެމްޕެއިން ހަރަކާތުގައި ވާހަކަފުޅު ދައްކަވަމުންނެވެ.
އެގޮތުން ރައީސް ޑރ.މުޢިއްޒު ވިދާޅުވީ، އައްޑޫ ސިޓީއަކީ މި ސަރުކާރުން ގެންގުޅޭ ޤައުމީ ތަރައްގީގެ ޕްލޭނުގައި ވަރަށް މުހިންމު ހިއްސާއެއް އޮތް ތަނެއް ކަމަށާއި މި ޕްލޭން ގެ ދަށުން އައްޑޫގެ ރައްޔިތުން ބޭނުންވާ ތަރައްގީ ގެނައުމުގެ މަސައްކަތް ކުރާއިރު، އެކަން ހާސިލު ކުރުމަށްޓަކައި ސިޓީގެ ރައްޔިތުންގެ އެއްބާރުލުމުގެ މުހިންމުކަމަށެވެ.
ތަރައްގީގެ ޕްލޭންވެސް ފާސްވާން އޮތީ މަޖިލީހުގެ ތެރެއިން ކަމަށްވާއިރު، އެމަނިކުފާނު ބޭނުންފުޅުވަނީ 20 އަހަރުގެ ދުރު ރާސްތާ ތަރައްގީގެ މާސްޓަރ ޕޭލެނެއް އެކަމަށް ހާއްސަ ގާނޫނެއް ހަދައިގެން ގާނޫނަކުން ހިމާޔަތްތެރިކަމާއި ރައްކާތެރިކަން ލިބޭ ތަރައްގީގެ މާސްޓަރ ޕްލޭނެއް ގެނެސްދެއްވުމަށް ކަމަށް ވެސް ރައީސް ޑރ.މުޢިއްޒު ވަނީ ވިދާޅުވެފައެވެ.
"ނަތީޖާ ނެރެދީ، އައްޑޫ ސިޓީގެ ރައްޔިތުން ތާއަބަދު ތިޔަ އުއްމީދު ކުރަމުން އައި ތަރައްގީ އަޅުގަނޑު ހޯދައިދޭނަން އިރާދަކުރެއްވިއްޔާ މި ފަހަރު،"
ރައީސް ޑރ.މުޢިއްޒު ވިދާޅުވިއެވެ.
މީގެ އިތުރުންވެސް ރައީސް ޑރ.މުޢިއްޒު ވަނީ އައްޑޫ ސިޓީގެ ކަންކަމުގައި މަޖިލީސް ތެރޭގައި ބަސް ކިޔަން އަބަދު އެއްބަޔަކަށް ދީފައި އޮތުމުން މާނަ ހުރި ދެމެހެއްޓެނިވި ތަރައްގީއެެއް ހާސިލްވެފައިނުވާކަން ފާހަގަކޮށް، އެކިވަރުގެ މަޝްރޫޢުތައް ހިންގާފައި ހުރި ނަމަވެސް އައްޑޫ ސިޓީގެ ރައްޔިތުން ބޭނުންވާ ކަންކަން ހާސިލް ނުވާ ކަމަށްވެސް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
