ރައްޔިތުންގެ މަޖިލީހާ ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާން (ޔޫއެންޑީޕީ)އާ ގުޅިގިގެން މަޖިލިހަށް ތައާރަފުކުރަން ނިންމާފައިވާ އިލެކްޓްރޯނިކް ޕެޓިޝަން (އީ-ޕެޓިޝަން) ނިޒާމުގެ ސިޔާސަތު ކަރުދާހަށް އާންމުންގެ ޚިޔާލު ހޯދަން ހުޅުވާލައިފި އެވެ.

މަޖިލީހުގެ އިދާރާ އިން މިއަދު ބުނީ، އެ އެތަނާއި ޔޫއެންޑީޕީ ގުޅިގެން ތައާރަފުކުރަން ނިންމާފައިވާ ނިޒާމުގެ ސިޔާސަތު ކަރުދާހަށް މި މަހުގެ 29 އާ ހަމައަށް ހިޔާލު ހުށަހެޅޭނެ ކަމަށެވެ. ހިޔާލު ހުށަހަޅަން ޖެހެނީ ޕެޓިޝަން ކޮމިޓީ އަށް އީމެއިލް މެދުވެރިކޮށް ނުވަތަ އެކަމަށް ޚާއްސަ ލިންކް އިންނެވެ.

އީ-ޕެޓިޝަން ނިޒާމާ ގުޅޭ ތަފްސީލުތައް ހާމަކުރުމަށް މައުލޫމާތު ބައްދަލުވުންތައް ބާއްވަން ނިންމާފައިވަނީ މިމަހުގެ 24 ވަނަ ދުވަހާއި 25 ވަނަ ދވަހުއެވެ. އެގޮތުން 24 ވަނަ ދުވަހު އޮންނާނީ، ސަރުކާރުގެ މުވައްސަސާތަކާއި ސިޔާސީ ޕާޓީތަކުގެ އިތުރުން ޔުނިވާސިޓީތަކާއި މަދަނީ ޖަމިއްޔާ ޖަމާޢަތްތަކަށް އޮންނަ ބައްދަލުވުމެވެ. މި ބައްދަލުވުން އޮންނާނީ ހެނދުނު 10:00 ގައެވެ. އާންމު ރައްޔިތުންނަށް މައުލޫމާތު ދޭ ބައްދަލުވުން ބޭއްވުމަށް ހަމަޖެހިފައިވަނީ މި މަހުގެ 25 ވަނަ ދުވަހުގެ ހަވީރު 4:00 ގަ އެވެ.

އީ-ޕެޓިޝަން ނިޒާމަކީ މިހާރު ޢަމަލުކުރަމުން އަންނަ ޕެޓިޝަން ނިޒާމު ޒަމާނީކުރުމުގެ ބޭނުމުގައި ރައްޔިތުންގެ މަޖިލީހާއި ޔޫއެންޑީޕީ ގުޅިގެން ތައާރަފު ކުރުމަށް ނިންމާފައިވާ ނިޒާމެކެވެ. އެ ގޮތުން ވަކި ޢުމުރުފުރާއެއް ނެތި ކޮންމެ މީހަކަށްވެސް ޕެޓިޝަން ހުށަހެޅޭ ގޮތަށް އޮންނަ ނިޒާމަކަށް، މި ނިޒާމު ހެދުމަށްޓަކައި ޑިޖިޓަލް އައިޑީ ބޭނުންކޮށްގެން ވަދެވޭ ގޮތް ހެދުމަށް ވަނީ ނިންމާފައެވެ. މި ނިޒާމު ހެދިފައިވަނީ ކޮންމެ ރައްޔިތަކަށްވެސް ޕެޓިޝަނުގައި ސޮއިކުރުމުގެ ހުއްދަ އެއްފަހަރު ދެވޭ ގޮތަށް ކަމަށް ރައްޔިތުންގެ މަޖިލީހުން އެކުލަވާލާފައިވާ ކަރުދާހުގައި ވަނީ ބަޔާންކޮށްފައެވެ.

އީ-ޕެޓިޝަން ނިޒާމު ތަޢާރަފުކުރުމަށް އެކުލަވާލި ކަރުދާހުގައިވާގޮތުން އީ-ޕެޓިޝަނެއްގައި ރާއްޖޭގެ އާބާދީގެ 0.2 އިންސައްތަ މީހުން ސޮއިކޮށްފިނަމަ އެ މައްސަލަ މަޖިލީހުގެ ޕެޓިޝަން ކޮމިޓީން ދިރާސާކުރުމަށްފަހު ފިޔަވަޅު އެޅާ، ސަރުކާރުގެ ސަމާލުކަމަށް އެކަމެއް ގެންނަން ޖެހެއެވެ. އަދި އާބާދީގެ 0.5 އިންސައްތަ މީހުން އީ-ޕެޓިޝަންގައި ސޮއިކޮށްފިނަމަ އެ ޕެޓިޝަނަކަށް މަޖިލީހުގައި ބަހުސްކުރަން ފޮނުވާނެއެވެ