ދިވެހި ރާއްޖެއަކީ ޗައިނާއާއި އިންޑިޔާގެވެސް ރަޙްމަތްތެރިއެއް ކަމުގައި އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ތުރުކީގެ ޓީއާރްޓީ ވޯލްޑް ނޫހަށް ދެއްވި އިންޓަވިއުއެއްގައި ވަޒީރު މުޙައްމަދު ސަޢީދު ވިދާޅުވީ، ދިވެހިރާއްޖެއިން ޗައިނާއާއި އިންޑިޔާ އާ ދެ ޤައުމާވެސް ގުޅުން ބާއްވާނެ ކަމަށެވެ. އަދި އިންޑިޔާއާއި ޗައިނާއާ ދެ ޤައުމުގެ ފަތުރުވެރިންވެސް ދިވެހިރާއްޖޭގެ އަގުވަޒަން ކުރާކަމަށެވެ. ދިވެހިރާއްޖެއަކީ ދުނިޔޭގެ ހުރިހާ ޤައުމަކާވެސް ގުޅުން ބާއްވަން ބޭނުންވާ، ފަތުރުވެރި، މުޅި ދުނިޔެއަށްވެސް ހުޅުވާލެވިފައިވާ ޤައުމެއް ކަމަށްވެސް ވަޒީރު ވިދާޅުވިއެވެ.
މީގެ އިތުރުން ވަޒީރު ވިދާޅުވީ، ވިޔަފާރީގައި، އިންޑިޔާއާއި ޗައިނާއަކީވެސް ދިވެހިރާއްޖެއަށް ވަރަށް މުހިންމު ދެ މާކެޓް ކަމަށެވެ. އަދި ދިވެހި ސަރުކާރު ދެކޮޅު ކަމަކީ ބޭރު ސިފައިން ރާއްޖޭގަިއ ތިބުން ކަމަށެވެ.
ފާއިތުވި މަސްތަކުގައި އިންޑިއާގެ ފަތުރުވެރިންގެ އަދަދު މަދުވުމާ ގުޅޭ ގޮތުން ސުވާލު ކުރެއްވެމުން، ވަޒީރު ވިދާޅުވެފައި ވަނީ އަބަދުވެސް ބައެއް ޤައުމުތަކުން އަންނަ ފަތުރުވެރިން އިތުރުވާއިރު އަނެއްބައި ޤައުމުތަކުން އަންނަ ފަތުރުވެރިން މަދުވާ ކަމަށެވެ.
"މިސާލަކަށް ކޯވިޑްގެ ކުރިން ޗައިނާ އޮތީ އެއްވަނައިގައި ނޫން. އެކަމަކު މިހާރު މިވަނީ ބައުންސް ބެކް ވެފަ. ރާއްޖެއަށް ކޮންމެ ދުވަހަކު – ގާތްގަނޑަކަށް ކޮންމެ ގަޑިއިރަކު – އިންޑިއާއިން އަންނަ ފްލައިޓްތައް އެބަހުރި."
ވަޒީރު މުޙައްމަދު ސަޢީދު ވިދާޅުވިއެވެ.
ނިމިދިޔަ ސަރުކާރުން އިންޑިޔާ އާއި ވަރަށް ގާތް ގުޅުމެއް ބާއްވާފައި ވާއިރު، އެ ސަރުކާރުގައި ރާއްޖޭގެ އެއްވަނަ މާކެޓްގެ ގޮތުގައިވެސް އިންޑިޔާ ވެގެން ދިޔައެވެ. ނަމަވެސް ޑިސެމްބަރު މަހުން ފެށިގެން އިންޑިޔާއިން އަންނަ ފަތުރުވެރިންގެ އަދަދު މަދުވެ، މިހާރު އިންޑިޔާ އުޅެނީ 4 ވަނަ އާއި 5 ވަނައިގައެވެ.
Advertisement
This content is created and paid for by advertisers and does not involve Voice Journalists
