ޕީޕަލްސް ނޭޝަނަލް ފްރޮންޓް (ޕީއެންއެފް) އުފެއްދުމަށް މިރޭ ބާއްވަން ހަމަޖެހިފައިވާ ޚާއްސަ ޖަލްސާގައި، ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ބައިވެރިވެވަޑައިގަންނަވާ ގޮތަކީ ސަޕްރައިޒެއް ކަމަށް ޕީއެންއެފްއިން ބުނެފިއެވެ.
ޕީއެންއެފް އުފެއްދުމުގެ މަސައްކަތުގައި އިސްކޮށް ހަރަކާތްތެރިވާ، ކުރީގެ ސައިންސް މިނިސްޓަރު، މުހައްމަދު މަލީހު ޖަމާލު ވިދާޅުވީ، ކޮންމެ ގޮތެއް ވިޔަސް މިރޭގެ ޖަލްސާގައި، ޔާމީން ބައިވެރިވެ ވަޑައިގަންނަވާނެކަމަށެވެ. ނަމަވެސް އެމަނިކުފާނު ޖަލްސާގައި ބައިވެރިވެ ވަޑައިގަންނަވާނެ ގޮތެއް ހާމައެއް ނުކުރައްވައެވެ.
މިދިޔަ ސަރުކާރުގެ ފަހު ކޮޅު ރައީސް ޔާމީނުގެ ބަންދަށް ބޮޑު ލުއިތަކެއް ދިނުމާއެކު، ގޭބަންދަށް ބަދަލުކޮށްފައިވާއިރު، ކަރެކްޝަނުން ހުއްދަ ދެއްވާފައިވަނީ ޢާންމު މެންބަރެއްގެ ގޮތުގައި ސިޔާސީ ހަރަކާތްތަކުގައި ބައިވެރިވުމަށެވެ. ޕީއެންއެފް އުފެއްދުމަށް ބާއްވާ ޖަލްސާގައި ޔާމީން ބައިވެރިވެވަޑައިގަންނަވާނެ ކަމަށް އިއުލާން ކުރެއްވުމުން، ކަރެކްޝަނުން ވަނީ އެ މަނިކުފާނަށް އެއްގޮތަކަށްވެސް އެ ޖަލްސާގައި ބައިވެރިނުވެވޭނެ ކަމަށް އަންގާފައެވެ.
ޕީއެންއެފް އުފެއްދުމުގެ ހުއްދަ އިލެކްޝަން ކޮމިޝަނުން ދެއްވާފައިވަނީ މިދިޔަ އަހަރުގެ ނޮވެމްބަރު މަހުގެ 29 ގައެވެ. ޕާޓީ އުފެއްދުމަށް ބާއްވާ ޚާއްސަ ޖަލްސާ ބޭއްވުމުގެ ހުއްދަ މިދިޔަ ބުރާސްފަތި ދުވަހު ދީފައިވާއިރު މި ޖަލްސާ ބޭއްވުމަށް ހަމަ ޖެހިފައިވަނީ މިރޭ 9:15 ގައި ޣިޔާސުއްދީން ސުކޫލް ހޯލުގައެވެ.
Advertisement
This content is created and paid for by advertisers and does not involve Voice Journalists
