ސަރުކާރާއި ރައްޔިތުންނާއި ދެކޮޅަށް ދައްކަމުންދާ ވާހަކައަށް ޖާގަ ދޭނެހާ ވަގުތެއް ރައްޔިތުންގެ އަތުގައި ނެތްކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެެވެ.

މިމަހުގެ 21 ވަނަ ދުވަހު އޮންނަ ރައްޔިތުންގެ މަޖިލީހުގައި ކެނޑިޑޭޓުންގެ ތެރެއިން، މާފަންނު އުތުރު ދާއިރާގެ ކެނޑިޑޭޓް، އެމްއެންޕީގެ ލީޑަރު މުހައްމަދު ނާޒިމްގެ ކެމްޕޭން ޖަލްސާގައި ވާހަކަފުޅު ދައްކަވަމުން ރައީސް ޑރ.މުޢިއްޒު ވަނީ  އެފަދައިން ވާހަކަތައް ދެއްކުމުގެ ފުރުސަތު އިދިކޮޅުފަރާތްތަކަށް ނުދިނުމަށްވެސް ގޮވާލައްވާފައެވެ.

މިގޮތުން، ރައީސް ޑރ.މުއިއްޒު ވިދާޅުވީ، ކުރީގެ ސަރުކާރުތަކުން ކޮށްފައި ހުންނަ ކަންތައްތަކުގެ ބަދަލު ހިފުމަކީ އަބަދުވެސް ކަންތައް ހިނގަމުންދާ ގޮތް ކަމަށާއި، އޭގެ އެއް މިސާލަކީ ކުރީ ސަރުކާރުގައި އުފެއްދި ރިޔާސީ ކޮމިޝަން ކަމަށެވެ. ކުރީގެ ރައީސް ޞާލިހުގެ ވެރިކަމުގައު އުއްފެއް ރިޔާސީ ކޮމިޝަނަކީ ކުރީގެ ސަރުކާރުތަކުން ހިންގި ކޮރަޕްޝަނާއި ހިޔާނާތުގެ މައްސަލަތައް ބެލުމަށް އުފައްދާފައިވާ ތަނެކެވެ. 

Advertisement

އެހެންނަމަވެސް، މިސަރުކާރުން ބަދަލު ހިފުމަށް އެފަދަ ކަމެއް ނުކުރާނެ ކަމަށާއި، އެއްވެސް ބޭފުޅަކު ސިޔާސީ ވެގެން ފާޅުކުރައްވާ ހިޔާލަކާ ގުޅިގެން މިހާރު ފުލުސް އޮފީހަކަށް އެބޭފުޅުން ނުގެންދާނެ ކަމަށް ވެސް ރައީސް ޑރ.މުޢިއްޒު ވަނީ ވިދާޅުވެފައެވެ.

ސިޔާސީ ބޭފުޅުން އެކަމާއި ކަންބޮޑު ވެގެން ވެސް އުޅެން ނުޖެހޭކަން ފާހަގަކުރައްވާ ރައީސް ޑރ.މުޢިއްޒު ވިދާޅުވީ، އިދިކޮޅު ފަރާތްތަކުން ބަދަލުހިފުމުގެ ރޫހުގައި ޕޯޑިއަމްތަކުގައި ވާހަކަދައްކަވަމުން ކަމަށެވެ.

މީގެ އިތުރުންވެސް ރައީސް ޑރ.މުޢިއްޒު ވަނީ ރާއްޖޭގައި ހަމަޖެހުން ގާއިމްކުރަން ބޭނުންވާނަމަ، މަޖިލިސް ތެރެއިން ޖެއްސުންކުރުމާއި، ހަމަނުޖެހުމާއި، ދެކޮޅު ހެދުމުގެ މަންޒަރު ފެންނާނެ ގޮތަށް ރައްޔިތުން ފުރުސަތު ނުދެއްވުމަށާއި  ތަރައްގީ ގެންނަން ބޭނުންވާނަމަ ސަރުކާރާއި އެއްކޮޅަށް ރައްޔިތުން ވޯޓް ދެއްވުމަށް ވެސް އެދިވަޑައިގެންފައެވެ.