ރައްޔިތުންގެ މަޖިލީހުގެ އައްޑޫގެ ދާއިރާތަކަށް އެއްބަޔަކު ހޮވައިގެން ތަރައްގީ އަށް އުއްމީދު ކުރާތާ އެތައް އަހަރެއްވެއްޖެ ކަމަށާއި، އެހެންނަމަވެސް ވީ ކަމެއް ނެތް ކަމަށް ކުރިއަށް އޮތް މަޖިލީސް އިންތިހާބުގައި ޕީއެންސީގެ ޓިކެޓުގައި ހިތަދޫ މެދު ދާއިރާ އަށް ވާދަކުރައްވާ އަހުމަދު އަޒާން ވިދާޅުވެއްޖެއެވެ.

ރޭގައި ސަރުކާރު ހިންގާ ކޯލިޝަންގެ މައި ޕާޓީ، ޕީއެންސީ އިން އައްޑޫ ހިތަދޫ ހައި ސްކޫލުގައި ބޭއްވި ޖަގަހަ ޖަލްސާގައި ވާހަކަފުޅު ދައްކަވަމުން އަޒާން ވަނީ ރައްޔިތުންގެ މަޖިލީހަށް އެއްބަޔަކު ހޮވައިގެން އައްޑޫ އަށް މިހާތަނަށް ކުރިއެރުމެއް ނުލިބުނުކަން ފާހަގަކޮށް  މި ފަހަރުގެ މަޖިލިސް އިންތިހާބުގައި ބަދަލު ގެންނަންޖެހޭ ކަމަށް ވިދާޅުވެފައެވެ.

އަޒާން ވިދާޅުވީ، އެމްޑީޕީ އަށް ސުޕަ މެޖޯރިޓީ ދިނުމުންވެސް ރައްޔިތުން ފުއްދުންތެރި ބަޔަކަށް ހެދިފައި ނުވާއިރު، އައްޑޫގައި ތަަރައްގީ ކުރާނެ ކަމަށް ބުނި 8،000 އެނދު ތަރަަައްގީ ނުކުރެވޭ ކަމަށާއި، ފަސް މަންޒިލުން ފްލައިޓު ނައިސް ރިސޯޓު ވެސް ނުހުޅުވުނު ކަމަށެވެ. 

އައްޑޫގެ ރައްޔިތުން ތިބީ ހެޔޮ ބަދަލަކަށް އެދިއެދި ކަމަށާއި، ތަރައްގީ ގެނެވޭނީ މި ސަރުކާރާ ގުޅިގެން ކަމަށް ވެސް އަޒާން ވިދާޅުވިއެވެ. އަޒާން ވިދާޅުވީ، އެބޭފުޅާ ހިތަދޫގެ މެދުދާއިރާގެ ގޮނޑި އަށް ވާދަކުރައްވަނީ އަރާމާއި އިއްޒަތުގެ ބޭނުމުގައި ނޫން ކަމަށާއި ރަށަށް ތަރައްގީ ގެނައުމަށް ކަމަށެވެ.

އިންތިހާބަކުން ބަލިވުމުން ޖެއްސުން ކުރުމަށް އުޅޭ ބަޔަކަށް ވޯޓު ދިނުމަކީ ރަނގަޅު ގޮތަކަށް ނުވާނެކަމަށް ވިދާޅުވެ އެމްޑީޕީއަށް ފާޑުކިޔުންތައް ވެސް އަޒާން އަމާޒުކުރެއްވި އިރު، ރައީސް ޑރ.މުޢިއްޒަކީ ރަނުން ރަނަށް ވައުދުތައް ފުއްދަވާނެ ބޭފުޅަކަށްވާއިރު، ހެޔޮ ބަދަލެއް އައްްޑޫ އަށް ގެނައުމަށް ސަރުކާރުގެ ކެންޑިޑޭޓުންނަށް ވޯޓު ދިނުމަށް އަޒާން ގޮވާލެއްވިއެވެ.