ވެހިކަލް ގެނެސްދޭނެ ކަމަށް ބުނެ މަކަރާއި ހީލަތުން ގިނަ ބައެއްގެ އަތުން ފައިސާ ހޯދާފައިވާ ކަމަށް މެގަޓްރޯން މޮޓޯސް މޯލްޑިވްސް ވޭވް އިންޓަނޭޝަނަލް ނަމަކަށް ކިޔާ ކުންފުންޏަކަށް ތުހުމަތުކޮށް މައްސަލަ ތަޙްޤީގުކުރަން ފަށައިފިއެވެ.
ފުލުހުން މިއަދު ވިދާޅުވީ، މި މައްސަލައަކީ ފުލުހުންގެ އިކޮނޮމިކް ކްރައިމް ޑިޕާޓްމަންޓުން ތަޙްޤީގު ކުރަމުންދާ މައްސަލައެއް ކަމަށާއި މައްސަލައިގައި އިތުރު މީހުންގެ އަތުން ފައިސާ ނަގާފަވޭތޯ ބަލަން ބޭނުންވާ ކަމަށެވެ.
އެހެންކަމުން، އެކުންފުންޏަށް ވެހިކަލް ގެނައުމުގެ ނަމުގައި ފައިސާ ދައްކާފައިވާ ފަރާތެއްނަމަ 9790048 އަށް ގުޅައިގެން އެ މައުލޫމާތު ހިއްސާކުރުމަށް ފުލުހުން ވަނީ އެދިފައެވެ.
މެގަޓްރޯން މޯލްޑިވްސް ވޭވް އިންޓަނޭޝަނަލް އިން، މަކަރާއި ހީލަތުން ގިނަ ބައެއްގެ އަތުން ނަގާފައިވަނީ ކިހާ އަދެދެއްގެ ފައިސާ ކަމެއް ފުލުހުން ހާމަކޮށްފައެއް ނުވެއެވެ.
އެކިކަހަލަ އުކުޅުތައް ބޭނުންކޮށްގެން މަކަރާއި ހީލަތުން ފައިސާ ހޯދުމަށް އެކިއެކި މީސްމީހުން އަބަދުވެސް ސްކޭމްތައް ހިންގަމުންދެއެވެ. މި ފަދަ ކަންކަމަށް ސަމާލުވުމަށާއި ހޭލުންތެރިވުމަށް ފުލުހުންނާއި ކަމާ ބެހޭ އެހެނިހެން ފަރާތްތަކުން އަބަދު ވެސް ދަނީ ގޮވާލަމުންނެވެ.
Advertisement
This content is created and paid for by advertisers and does not involve Voice Journalists
