ކުރީގެ ރައީސް، އިބްރާޙިމް މުހައްމަދު ޞާލިހުގެ ސަރުކާރުގައި، މާލޭ ރައްޔިތުންނަށް ބޯހިޔާވަހިކަން ފޯރުކޮށްދެވުނީ މަޖިލީހުގެ މެޖޯރިޓީ ލިބިފައި އޮތުމުން ކަމަށް، އެމްޑީޕީގެ ޓިކެޓްގައި މާފަންނު ދެކުނު ދާއިރާއަށް ވާދަކުރައްވާ ކެންޑިޑޭޓް ހަސަން އިއާދު ސަލީމް (އިއަޑޭ) ވިދާޅުވެއްޖެއެވެ. 

ކުރީ ސަރުކާރުގެ ފަސް އަހަރުގައި، މަޖިލީހުގެ ސުޕަ މެޖޯރިޓީ އެމްޑީޕީ އަތުގައި އޮވެގެން ކިރެވުނީ ކޮން ކަމެއްތޯ ބުނެ އިއާދަށް ކުރެވުނު ސުވާލަށް ޖަވާބު ދެއްވަމުން އޭނާ ވިދާޅުވީ، ދައުރެއްގައި ފަސް އަހަރު އޮންނަ އިރު، ކޮވިޑްގެ އާލަމީ ވަބާ އާއި ގުޅިގެން ދެ އަހަރާއި ބައި ދިޔަ ކަމަށެވެ. 

އަދި ކޮވިޑާއި ގުޅިގެން މުޅި ދުނިޔެ ހުއްޓުނު ކަމަށާ، އެހެން ނަމަވެސް ރާއްޖެ އެކަމުންވެސް އަރައިގަނެ އެންމެ ފުރަތަމަ އެއާޕޯޓްވެސް ހުޅުވާލީ ރާއްޖެއިން ކަމަށް އޭނާ ވިދާޅުވިއެވެ. 

Advertisement

އިއާދު ވިދާޅުވިގޮތުގައި، އެމްޑީޕި ސަރުކާރަށް ވެރިކަން ކުރަން ލިބުނު ދެ އަހަރާއި ބައިގައި، ކޮށްދިން ކަންކަނަ މަދެއް ނޫނެވެ. އަދި އެކަންކަން ކުރެވުނީ މެޖޯރިޓީ މަޖިލީހުގައި އޮތުމުން ކަމަށް އޭނާ ވިދާޅުވިއެވެ. 

އިއާދު މިހެން ވިދާޅުވެފައި ވާއިރު، ސަރުކާރުން އަންނަނީ، މިވަގުތުވެސް އެމްޑީޕި އަތުގައި މަޖިލިސް މެޖޯރިޓީ އޮތް ކަމަށާ، އެ މެޖޯރިޓީ އޮވެގެން ކުރާ ކަމަކީ ސަރުކާރަށް ޖެއްސުމް ކުރުން ކަމަށް ބުނެފައެވެ. 

އެގޮތުން، ރައީސުލްޖުމްހޫރިއްޔާ ޑރ މުހައްމަދު މުއިއްޒުވެސް ވަނީ، މިއަހަރުގެ ބަޖެޓް ފާސްކުރިއިރުވެސް ވަރަށް ގިނަ ކަންކަމަށް މަޖިލީހުން ފުރުސަތު ދީފައި ނުވާކަން ފާހަގަކުރައްވާފައެވެ. އަދި މަޝްރޫއުތައް ބައެއް ރަށް ރަށުގައި މަޑު ޖެހުފައި ވަނީވެސް ބަޖެޓް ފާސްކުރި އިރު އެއަށް ބަޖެޓް ދީފައި ނުވުމުން ކަމަށް އެމަނިކުފާނު ވިދާޅުވެފައި ވެއެވެ.