އައްޑޫ ސިޓީގެ ފަތުރުވެރިކަން ކުރިއެރުވުގެ ގޮތުން ފެށުމުމަށް ހަމަޖެހިފައިވާ، އެންމެ ބޮޑު މަޝްރޫޢު، "ހަންކެޑެ އިންޓެގްރޭޓެޑް ޓޫރިޒަމް ޑިވެލޮޕްމަންޓް" މަޝްރޫޢުގެ ބިންގާ މިރޭ އެޅުމަށް ހަމަޖެހިއްޖެއެވެ.

ބިންގާ އެޅުމުގެ ރަސްމިއްޔާތު ކުރިއަށްދާނީ ހަންކެޑެ ސަރަހައްދުގައި މިރޭ 8:30 އިން 10:00 އަށެވެ.

މި ރަސްމިއްޔާތު ޝަރަފުވެރިކޮށްދެއްވުމަށްޓަކައި، މިނިސްޓަރ އޮފް ހޯމްލޭންޑް، ސެކިޔުރިޓީ އެންޑް ޓެކްނޮލޮޖީ، އަލީ އިހުސާން ވަޑައިގެންނެވުމަށް ވަނީ ހަމަޖެހިފައެވެ. އަދި މި ޖަލްސާގައި ދައުލަތުގެ ބައެއް އިސްފަރާތްތަކާއި، ފަތުރުވެރިކަމުގެ ދާއިރާގެ ގިނަ ފަރާތްތަކެއް ބައިވެރިވެލައްވާނެކަމަށް މައުލޫމާތުލިބެއެވެ.

މި މަޝްރޫޢުގެ ޢަމަލީ މަސައްކަތްތައް ވަރަށް އަވަހަށް ފަށްޓަވާނެކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާންކުރައްވާފައިވަނީ މިމަހުގެ 12 ވަނަ ދުވަހުއެވެ. ޕީއެންސީއިން އައްޑޫ ހިތަދޫގައި ބޭއްވި ޖަލްސާގައި ވާހަކަ ދައްކަވަމުން ރައީސް ވިދާޅުވީ 2،080 އެނދުގެ މި ބޮޑު މަޝްރޫޢު މިހާރު އޮތީ ޢަމަލީ މަސައްކަތް ފެށޭ ހިސާބުގައި ކަމަށެވެ.

ހަންކެޑެ މަޝްރޫޢަކީ އައްޑޫގެ ފަތުރުވެރިކަމަށް ބޮޑު އިންގިލާބެއް ގެންނާނެ ބޮޑު މަޝްރޫޢެކެވެ. ބިންގާ އެޅުމުގެ ރަސްމިއްޔާތުގައި ލައިވް މިއުޒިކާއެކު ހަވާ އެރުވުމަށްވެސް ވަނީ ހަމަޖެހިފައެވެ.