އިދިކޮޅު އެމްޑީޕީން އެދެނީ ސުލްހަވެރިކަމާއިއެކުގައި މަޖިލިސް އިންތިހާބުގެ ކެމްޕޭން ނިންމާލުމަށްކަމަށް އެ ޕާޓީގެ އެޑްވައިޒަރު އަދި ކުރީގެ ރައީސް އިބްރާހިމް މުޙައްމަދު ޞާލިހު ވިދާޅުވެއްޖެއެވެ.

މިމަހުގެ 21 ވަނަ ދުވަހު އޮންނަ މަޖިލީސް އިންތިޚާބަށް އެ ޕާޓީން ކުރަމުންދާ ކެމްޕޭންގެ ތެރެއިން، ޅ.ހިންނަވަރަށް ވަޑައިގެން އެ ރަށުގައި ބޭއްވި ކެމްޕޭން ޖަލްސާއެއްގައި ވާހަކަފުޅު ދައްކަވަމުން ރައީސް ޞާލިހު ވިދާޅުވީ، ވާދަވެރި އިންތިހާބެއް ކުރިއަށްދާތީ ވަރަށް އުފާވާ ކަމަށާއި، އެމްޑީޕީން އެދެނީ މި އިންތިހާބުގެ ކެމްޕޭން އެއްބަޔަކު އަނެއްބަޔަކާ ދޭތެރޭ ނަފުރަތެއް ނެތި ރީތިކޮށް ނިންމާލަން ކަމުގައިއެވެ.

މަޖިލިސް އިންތިހާބުގެ ކެމްޕޭން ކުރިއަށް ގެންދިޔުމަށް ދެން އޮތީ މަދު ދުވަސްކޮޅެއްކަން ފާހަގަކުރައްވާ ރައީސް ޞާލިޙު ވިދާޅުވީ،  އެމްޑީޕީން ކުރަންވީ ކަމަކީ ފޯކަސް ގެއްލުވާނުލައި އެމްޑީޕީގެ ސިޔާސަތުތައް ރައްޔިތުންނަށް ސާފުކޮށް ދިނުން ކަމަށެވެ.

ހަމައެއާއިއެކު، ރޭގައި ރައީސް ޞާލިހު ދެއްކެވި ވާހަކަފުޅުގައި ސަރުކާރަށް ވަރަށް ބޮޑަށް ފާޑުވިދާޅުވެފައިވާއިރު، އެމަނިކުފާނު ވިދާޅުވީ، ސަރުކާރުން މަޖިލިސް އިންތިހާބާ ދިމާކޮށް، ރައްޔިތުންނަށް އެކި ގޮތް ގޮތުން ބިރު ދައްކަމުން ކަމަށާއި އެގޮތުން ކުންފުނިތަކުގެ މުވައްޒަފުންނަށް ވަޒީފާގެ ބިރު ދައްކަމުންދާ ކަމަށެވެ. އެގޮތުން،  އަސާސީ ހިދުމަތެއް ކަމަށްވާ ކަރަންޓުގެ ހިދުމަތް ހަމައެކަނި ޕީއެންސީގެ މެމްބަރުންނަށް ދިނުމަށް އެޕާޓީން ގޮވާލަމުންދާ ކަމަށް ރައީސް ޞާލިޙު ވިދާޅުވިއެވެ.