ސަރުކާރުން ހިންގާ ތަރައްގީގެ މަޝްރޫއު ތަކަށް ހުރަސް އަޅާ ބަޔަކު މަޖިލީހަށް ހޮވަންވީ އެއްވެސް ސަބަބެއް ނެތް ކަމަށް ރައީސުލްޖުމްހޫރުއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ. 

ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ގަލޮޅު ދެކުނު ދާއިރާއަށް ޕީއެންސީގެ ފަރާތުން ވާދަކުރައްވާ ކެންޑިޑޭޓްގެ ކެންޕެއިން ޖަލްސާގައި ވާހަކަ ދައްކަވަމުން ރައީސް ވަނި، އަންނަ އާދީއްތަ ދުވަހު، ހެނދުނު ހެނދުނާއި ވޯޓުލާން ނުކުމެ ވަޑައިގެންނެވުމަށް އެދިވަޑައިގެންފައެވެ.

އެގޮތުން ވޯޓްލާއިރު ތަރައްގީއާއި، ގައުމުގެ ހަމަޖެހުމާއި، ގައުމުގެ މިނިވަންކަމާއި ސިޔާދަތަށް ވޯޓް ދެއްވުމަށް އެމަނިކުފާނު ވަނީ އެދިވަޑައިގެންފައެވެ. އަދި ރައީސް ވިދާޅުވިގޮތުގައި، ގައުމަށް އެކަންކަން ހާސިލް ވާނީ ސަރުކާރުން ނެރެފައިވާ ކެންޑިޑޭޓުންނަށް ވޯޓް ލައިގެންނެވެ. 

Advertisement

މީގެ އިތުރުން ރައީސް ވިދާޅުވީ، ގައުމުގެ މިނިވަންކަމާއި ސިޔާދަތަށްފަހު އެމަނިކުފާނު ވެވަޑައުގެންނެވި އެންމެ މުހިންމު ވަޢުދަކީ ގެދޮރުވެރިކަމުގެ ވައުދު ކަމަށެވެ. އަދި ގެދޮރުވެރިކަމަކީ މާލެއާއި ރާއްޖެތެރޭގެ ރައްޔިތުންނަށްވެސް ކުރިމަތުވެފައިވާ އެންމެ ބޮޑު މައްސަލަ ކަމަށްވާއިރު، އެމަބިކުފާނުގެ ދައުރު ނިމޭއިރު ހުރިހާ ރައްޔިތުންނަށްވެސް ބޯހިޔާވަހިކަން ކަށަވަރު ކޮށްދެއްވަން ބޭނުންވާ ކަމަށް ވިދާޅުވިއެވެ. 

ނަމަވެސް މަޖިލީހުގައި އެކަމަށް ހުރަސް އަޅާނެ ބަޔަކު ތިބި ނަމަ އެވައުދުވެސް ނުފުއްދޭނެ ކަމަށް އެމަނިކުފާނު ވިދާޅުވިއެވެ. 

ރައީސް ވިދާޅުވީ، ނިމިދިޔަ ފަސް އަހަރުގައި މަޖިލީހުގެ މެޖޯރިޓީ އޮވެމެ ބޯހިޔާވަހިކަން ކަށަވަރު ނުކޮށްދެވުނު ކަމަށެވެ. އަދި އެ ސަރުކާރަށް އެ މަސައްކަތް ފެށުނީވެސް ދައުރު ނިމެން ދެތިން ދުވަހަށް ވުމުން ކަމަށް އެމަނިކުފާނު ވުދާޅުވިއެވެ. އެގޮތުން ދިން އިރުވެސް ގޯތި ދީފައުވަނީ ފަޅުން ކަމަށާ ފުލެޓްތައް ވެސަ ހުރީ ނުނިމި ކަން އެމަނިކުފާނު ފާހަގަކުރެއްވިއެވެ. 

އެހެންކަމުން، އެފަދަ ބަޔަކަށް، ދެވަނަ ފަހަރަށް މަޖިލީހުގެ މެޖޯރިޓީ ދޭންވީ ސަބަބެއް ނެތް ކަމަށް ރައީސް ވަނީ ތަކުރާރުކޮށް ވިދާޅުވެފައެވެ.