އެމްޑީޕީން ބޭނުންވަނީ ރައްޔިތުންގެ މަޖިލީހުގެ މެޖޯރިޓީ ހޯދައިގެން ސަރުކާރު ޖަވާބުދާރީކުރުވުމުގެ ނަމުގައި ސަރުކާރު ވައްޓާލުމަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

އަންނަ އާދިއްތަ ދުވަހު ބާއްވާ ރައްޔިތުންގެ މަޖިލީހުގެ އިންތިހާބުގައި ޕީއެންސީގެ ފަރާތުން ގަލޮޅު ދެކުނު ދާއިރާއަށް ވާދަކުރައްވާ އިބްރާހީމް މުހައްމަދު (އިބުޓީ)ގެ ކެމްޕޭން ޖަލްސާއެއްގައި ރޭ ވާހަކަފުޅު ދައްކަވަމުން ރައީސް ވިދާޅުވީ ބްރިޖު އެޅުމާއި ތަރައްގީގެ އެހެނިހެން މަޝްރޫއުތައް ހިންގުމަށްވުރެ މުހިންމު ކަމަކީ ގައުމުގެ ހަމަޖެހުން ކަމަށެވެ. އަދި އެ ހަމަޖެހުން ނަގާލަން މަސައްކަތްކުރާ މަޖިލީހުގައި ބައިތިއްބުމަކީ ކޮށްގެންވާނެ ކަމެއް ނޫން ކަމަށްވެސް ވިދާޅުވިއެވެ. 

އެ މަނިކުފާނު ވިދާޅުވިގޮތުގައި ހަމަޖެހުން ނަގާލައި ތަޅާފޮޅަން މަސައްކަތްކުރާ ފަރާތްތަކާއި ޚިލާފަށް އެމަނިކުފާނުގެ ސިޔާސަތަކީ ހަމަޖެހުން ގާއިމް ކޮށް ބަދަލު ހިފުމުގެ ރޫހު ގައުމުން ނައްތާލުމެވެ. އަދި ކުރީގެ ވެރިކަންތަކުން ވަނީ ސިޔާސީ ބޭނުމެއްގައި ރައީސުންނާއި މިނިސްޓަރުން ހައްޔަރުކޮށްފައި ކަމަށާއި އެ މަނިކުފާނުގެ ސަރުކާރުން އެފަދަ ކަންކަން ނުފެންނާނެ ކަންވެސް ފާހަގަކުރެއްވިއެވެ. 

Advertisement

ކަން މިހެން ހުރި ނަމަވެސް، އިދިކޮޅު ފަރާތްތަކުން މިހާރު ވެސް ދައްކަނީ މަޖިލީހުގެ މެޖޯރިޓީ ހޯދައިގެން ރައްޔިތުން ބޮޑު އަޣުލަބިއްޔަތަކުން އިންތިހާބުކޮށްފައިވާ ސަރުކާރެއް ބަދަލުކުރުމާއި އަޒުލުކުރުމުގެ ވާހަކަތައް ކަންވެސް އެމަނިކުފާނު ފާހަގަކުރެއްވިއެވެ. 

މިއާއެކު މަނިކުފާނު ވިދާޅުވީ ގާނޫނީ ހަމަތަކުގެ މަތިން ކޮންމެ ފަސް އަހަރަކުން ވޯޓު ލައިގެން ސަރުކާރު ބަދަލު ކުރެވޭނެ ކަމަށާ، ނިމިދިޔަ ރިޔާސީ އިންތިޚާބުގައި ރައްޔިތުން ވަނީ އެ މަނިކުފާނަށް ވޯޓު ދެއްވައި ވެރިކަމަށް އިންތިޚާބު ކުރެއްވީ ފަސް އަހަރު ތެރޭގައި ކުރުމަށް ޒިންމާތަކެއް ހަވާލުކޮށްފައި ކަމަށެވެ. އެހެންކަމުން އެ މަނިކުފާނުގެ ހުރިހާ ވެސް އަމާޒެއް ހުރީ ވައުދުތައް ފުއްދެވުމަށް ކަމަށް ވިދާޅުވިއެވެ.

ރައީސް މުޢިއްޒު މިހެން ވިދާޅުވެފައިވާއިރު، ރާއްޖޭގެ ވެރިކަމުގައި ތިއްބެވި ބޭފުޅުންނަށް މަޖިލީހުގެ ތެރެއިން ފިޔަވަޅު އަޅައި އެ ބޭފުޅުން މަގާމުން ވަކިކުރަންޖެހޭ ވަގުތު ޖެހިއްޖެ ކަމަށް ކުރީގެ ރައީސް، އަދި އެމްޑީޕީގެ އެޑްވައިޒަރު އިބްރާހިމް މުހައްމަދު ޞާލިހު ވަނީ ދާދިފަހުން ވިދާޅުވެފައެވެ. 

އެގޮތުން ވިދާޅުވީ، މި ސަރުކާރުން ވަނީ، ރާއްޖޭގެ މާލީ އަދި އިގްތިޞާދީ ހާލަތު އޮތް ގޮތް ރައްޔޮތުންނަށް ވަރަށް ބޮޑަށް އޮޅުވާލާފައި ކަމަށެވެ. އަދި ރައްޔިތުންގެ މަޖިލީހުގައި، އެމްޑީޕީ މެންބަރުން ތިބޭ ނަމަ، ވަގުތުން އެކަން ކަމާއި ގުޅޭގޮތުން ވެރިންނާއި ކަމާއި ބެހޭ ފަރާތްތަކާއި ސުވާލުކޮށް ފިޔަވަޅު އަޅުއްވާނެ ކަމަށް ރައީސް ޞާލިހު ވިދާޅުވިއެވެ. 

“ގާނޫނު އަސާސީގައި ވަރަށް ސާފުކޮށް މަޖިލީހުގެ ދައުރު އެބައޮތް. ބަޖެޓް ފާސްކުރުމާއި. ގާނޫނުތައް ހެދުމާއި ވަޒީރުންނާއި ސުވާލުކޮށް މަގާމުން ވަކިކުރަންޖެހިއްޖެ ހާލަތެއްގައި އެކަން ކުރަންވެސް އެބައޮތް. އަދި އޭގެ އިތުރުން ވެރިއަކަށް ހުންނަ މީހާއާދޭތެރޭގައިވެސް އެފަދަ ކަމެއް ކުރަން ޖެހިއްޖެ ހާލަތެއްގައި ކުރުމުގެ ފުރުސަތު އެބަ އޮތް. އެކަން ގާނޫނު އަސާސީގައި ލިޔެފައި އެ އޮތީ މިފަދަ ވަގުތެއް އަތުވެދާނެ ކަމަށްޓަކައި. މިއަދު މިއޮތީ އެވަގުތު އައިސް ޖެހިފައި. ވެރިކަމުގައި ތިއްބެވި ބޭފުޅުން އެ ހައްދަވަމުންދާ ދޮގާއި އޮޅުވާލުންތަކުގެ ސަބަބުން، މަޖިލީހުގެ ތެރެއިން ފިޔަވަޅު އަޅަންޖެހޭ ހިސާބަށް މިއަދު ހިގައްޖެ. “ ކުރީގެ ރައީސް އަދި އެމްޑީޕީގެ އެޑްވައިޒަރު އިބްރާހީމް މުހައްމަދު ޞާލިހު ވިދާޅުވިއެވެ.