އެމަނިކުފާނުގެ ވެރިކަމުގެ ފަސް އަހަރުގެ ތެރޭގައި ރާއްޖޭގެ ވެރިކަންކުރާ މާލެ ސިޓީއާއި އެއް ފެންވަރަށް އައްޑޫ ސިޓީ ތަރައްގީ ކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ. 

މާލޭގައި ދިރިއުޅޭ އައްޑޫ ސިޓީގެ ރައްޔިތުންނަށް ޚާއްސަކޮށްގެން މިރޭ ބޭއްވި މަޖިލިސް ކެންޕެއިން ޖަލްސާގައި ވާހަކަ ދައްކަވަމުން ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު ވިދާޅުވީ، އައްޑޫ ސިޓީއަށް ވާދަކުރައްވާ ކެނޑިޑޭޓުންވެސް އަދި އެ ސިޓީގެ ރައްޔިތުންވެސް “އައްޑޫ ބަދަލަކަށް” ޝިޢާރު ބޭނުން ކުރައްވަނީ، މީގެ ކުރިން އައްޑޫ ސިޓީއަށް ކެންޑިޑޭޓުން ދެއްކި ހުވަފެންތައް ހަގީގަތަކަށް ނުވެ އެތަކެއް ޒަމާންތަކެއް ވެެގެން ގޮސްފައިވާތީ ކަމަށެވެ. 

އަދި މިހާރު އައްޑޫ ސިޓީގެ ރައްޔިތުން ބޭނުންވަނީ ބަދަލެއް ގެނެސްގެން އެ ސިޓީއަށް ތަރައްގީ ގެންނަން ކަމަށާ، ޕީއެންސީގެ ފަރާތުން މަޖިލީހަށް ވާދަކުރައްވާ ކެންޑިޑޭޓުން މަޖިލީހަށް އިންތިޚާބު ކުރައްވައިފި ނަމަ ނަތީޖާ ނެރެދެއްވާނެ ކަމަށް ރައީސް ވިދާޅުވިއެވެ. 

ރައީސް ވިދާޅުވީ، އެމަނިކުފާނަށް މުހިންމީ ނަތީޖާ ނެރެދިނުން ކަމަށެވެ. އަދި ރިޔާސީ އިންތިޚާބުގެ ކެންޕެއިން ތެރޭގައިވެސް އެމަނިކުފާނު އެފަދައިން ވިދާޅުވެފައިވާނެކަމަށާ މި ސަރުކާރުގެ އެއްވެސް ބޭފުޅެއް ނަތީޖާ ނެރެދިނުމަށް ނޫން ގޮތަކަށް އެންމެ ވަގުތެއްވެސް ހޭދަ ނުކުރައްވާނެ ކަމަށް އެމަނިކުފާނު ވިދާޅުވިއެވެ. 

މިއާއެކު ތަކުރާރުކޮށް ރައީސުލްޖުމްހޫރިއްޔާ ވިދާޅުވީ އެމަނިކުފާނުގެ ފޯކަސް ހުރީ ނަތީޖާ ނެރުމަށް ކަމަށާއި، އެ ނަތީޖާ ނެރެދިނުމަށް ސަރުކާރާއެކު މަސައްކަތް ކުރާނެ ބައެއް މަޖިލީހުގައި ތިބެން ޖެހޭކަމަށެވެ. އަދި ނަތީޖާ ނޫން އެއްޗެއް އެމަނިކުފާނަށް މުހިންމު ނޫންކަން ފާހަގަކުރައްވާ ރައީސް ޑރ. މުޙައްމަދު މުޢިއްޒު ވިދާޅުވީ، އަމިއްލަ ޕާޓީގެ މަސްލަހަތު އެކަނި އިސްކުރާ ބަޔަކު މަޖިލީހަށް ހޮވައިގެން އެކަން ނުވާނެ ކަމަށާ އެހެން ކަމުން އެފަދަ ބަޔަކު މަޖިލީހަށް ހޮވިޔަ ދީގެންވެސް ނުވާނެކަމަށެވެ.

މިރޭގެ ޖަލްސާ ތެރެއިން- ފޮޓޯ/ ވޮއިސް

މީގެ އިތުރުން ރައީސް ވިދާޅުވީ މި ސަރުކާރަށް މިވީ ފަސް މަސް ދުވަހުގެ ތެރޭގައިވެސް އައްޑޫ ސިޓީގެ ތަރައްގީއަށް މުހިންމު ކަންކަން ފެށިފައިވާ ކަމަށެވެ. އެކަން ކަން ކުރެވުނީ ވަރަށް ދަތި އުނދަގޫ ކަމާއެކު ކަމަށާ، އެކަމަށްޓަކައި މަޖިީހުގެ އެއްބާރުލުން ނުލިބުނު ކަމަށް އެމަނިކުފާނު ވިދާޅުވިއެވެ.  އެހެން ނަމަވެސް، ދަތިތަކާއެކުވެސް ރާއްޖޭގައި މިހާތަނަށް ހިންގާ އެންމެ ބޮޑު ޢުމްރާނީ ތަރައްޤީގެ އެއް މަޝްރޫޢު ކަމަށްވާ އައްޑޫ ބްރިޖުގެ ޑިޒައިން މަސައްކަތް ފެށި މިހާރު ކުރިއަށްދާކަން ރައީސް ފާހަގަކުރެއްވިއެވެ.

މިއާއެކު ރައީސް ވިދާޅުވީ، ސަރުކާރުން ކުރިއަށްގެންދާ ތަރައްގީގެ ޕްރޮޖެކްޓްތައް ހުއްޓުވުމުގެ ވިސްނުން ގެންގުޅުއްވާ ފަރާތްތައް މަޖިލީހަށް ހޮވައިގެން ވާނީ ވަގުތު ބޭކާރު ކަމަށެވެ. އެހެންކަމުން ރައްޔިތުންނަށް ކަމެއްކޮށްދިނުމުގެ ނިޔަތުގައި މަސައްކަތް ކުރަމުންދާ ސަރުކާރަކަށް މަޖިލީހުން ފުރުޞަތު ދޭން ޖެހޭ ކަމަށް ރައީސުލްޖުމުހޫރިއްޔާ ވިދާޅުވިއެވެ

.މިއާއެކު ރައީސް ވަނީ އައްޑޫގެ ތަރައްގީއަށް މި ސަރުކާރުން ފަށާފއއުވާ އެހެން ތަރައްގީގެ މަޝްރޫއު ތަކަށްވެސް އަލި އަޅުވާ ލައްވާފައެވެ. އެގޮތުން އައްޑޫގެ ފެނާއި ކަރަންޓު އަޕްގްރޭޑް ކުރުމުގެ މަސައްކަތާ، ހަންކެޑެ މަޝްރޫއު އެމަނިކުފާނު ފާހަގަކުރެއްވިއެވެ. އަދި ޝަންގްރިލާ މައްސަލަވެސް ހައްލު ކޮށްދެއްވާނެ ކަމަށް ވިދާޅުވިއެވެ. 

އެހެންކަމުން، އެހުރިހާ ކަމަކާއި، އެމަނިކުފާނު ވެވަޑައިގެންނެވި ހުރިހާ ވައުދެއް ފުއްދުމަށް އެއްބާރުލުން ދެއްވާނެ މެންބަރުން މަޖިލީހަށް ހޮވުމަށް ތަކުރާރުކޮށް ރައީސް މުޢިއްޒު ވަނީ އިލްތިމާސް ކުރައްވާފައެވެ.