ދަ ޑިމޮކްރެޓްސް އިން މަޖިލިސް އިންތިހާބުގައި ވާދަކުރަން ނުކުންނަނީ ލުއި ސަރުކާރުގެ ސިޔާސަތެއް ގާނޫނަކުން ކަށަވަރުކޮށްދޭންކަމަށް ދަ ޑިމޮކްރެޓްސް ގެ ފަރާތުން ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ވާދަކުރައްވާ އާޝިޔަތު އަލައިކާ އަދުނާން ވިދާޅުވެއްޖެއެވެ.
ރޭގައި ކުރީގެ ރައީސް ނަޝީދާއި އެކު ދަ ޑިމޮކްރެޓްސް އިން ބޭއްވި މަޖިލިސް އިންތިހާބުގެ ކެމްޕޭން ޖަލްސާގައި ވާހަކަފުޅު ދައްކަވަމުން އަލައިކާ ވަނީ އެ ޕާޓީން އަޑު އުފުލާން ބޭނުންވާ ކަންކަމުގެ ވާހަކަތައް ހިއްސާ ކުރައްވާފައެވެ.
މިގޮތުން އަލައިކާ ވިދާޅުވީ، ޕެންޝަން ސްކީމްގައި ލައްވާ ނުލާ، ކިޔެވޭނެ ފުރުސަތެއް ނެތް، އަދި އެހެނިހެން ވެސް އިނާޔަތެއް ނެތް އެންމެހާ ރައްޔިތުންގެ އަޑު އުފުލަން ބޭނުންވާ ކަމަށެވެ.
ދައުލަތުގެ އެއްވެސް މުދަލެއް އަދި ދައުލަތުން ފޯރުކޮށްދޭން ޖެހޭ އެއްވެސް ހިދުމަތެއް ގާނޫނަކުން ކަށަވަރުކުރާއިރު އެއްވެސް ރައްޔިތެއް ތަފާތުކުރެވިގެން ނުވާނެކަން ފާހަގަކުރައްވާ އަލައިކާ ވިދާޅުވީ، ރައްޔިތުންގެ މެދުގައި ތަފާތުކުރުން ތައް ބޮޑު ކަމަށާއި، ދައުލަތުގެ ވެރިންނާއި ނުފޫޒު ގަދަ ފަރާތްތަކުގެ މެދުގައި ރައްޔިތުންގެ މުދާތައް ބަހަމުންދާ މަންޒަރު ފެންނަ ކަމަށެވެ.
"އަޅުގަނޑުމެން މިނިކުންނަނީ މަތިބަރު ސަރުކާރުތަކަށް އޯކޭ ނުވާތީވެ ލުއި ސަރުކާރުގެ ސިޔާސަތެއް ގާނޫނަކުން ކަށަވަރުކޮށްދޭން އެސިޔާސަތު ހިފައިގެން."
އަލައިކާ ވިދާޅުވިއެވެ.
ބޮޑު މަޖިލީހެއް އޮތް ނަމަވެސް އެކަމުން ރައްޔިތުންނަށް މަންފާ އެއް ނުކުރާ ކަމަށާއި، ޑިމޮކްރެޓްސް އިން މަޖިލިސް ކުޑަކޮށް، ރައްޔިތުންނަށް މަޖިލިސް މެމްބަރުން ވަކި ކުރެވޭނެ ގާނޫނުތަކެއް އެޖެންޑާގައި ލިޔެވިގެން ރައްޔިތުންނަށް އެބާރުތައް ކަށަވަރުކޮށްދެއްވާނެ ކަމުގެ ޔަގީންކަން ވެސް އަލައިކާ ވަނީ ދެއްވާފައެވެ.
Advertisement
This content is created and paid for by advertisers and does not involve Voice Journalists
