ރައްޔިތުންގެ މަޖިލީހުގެ އިންތިހާބުގައި ވޯޓު ކަރުދާސް ދައްކާ ފަރާތްތަކާއިމެދު،ޖިނާއީ ތަހުގީގު ކުރެވި ދައުވާ އުފުލޭނެ ކަމަށް އިލެކްޝަންސް ކޮމިޝަނުން (އީސީ)ން ބުނެފިއެވެ.
އީސީގެ މެންބަރު ހަސަން ޒަކަރިއްޔާ ވިދާޅުވީ މި އިންތިހާބުގައިވެސް ވޯޓުލާ މަރުކަޒު ތަކުގައި ފުލުހުން ހަރަކާތްތެރި ވާނެ ކަމަށާ، ވޯޓު ކަރުދާސް ދެއްކުން ނުވަތަ ކަރުދާހުގެ ފޮޓޯ ނެގުމުގެ އެއްވެސް އަމަލެއް ހިނގާ ހިސާބުން ފެށިގެން އެސަރަހައްދުގައި ހަރަކާތްތެރިވާ ފުލުހުން އެކަން ބަލައި ޖިނާއީ ތަހުގީގު ކުރަން ފަށާނެ ކަމަށެވެ.
އަދި އެ ތަހުގީގު ކުރިއަށްދާއިރު ފުލުހުން ހަރަކާތްތެރިވާނީ ބޮޑީ ވޮން ކެމެރާއާއެކު ކަމަށާއި އެހުރިހާ މަންޒަރެއް ރެކޯޑު ކުރެވޭނެ ކަންވެސް އޭނާ ފާހަގަކުރެއްވިއެވެ.
އިންތިހާބުތަކާ ބެހޭ އާންމު ގާނޫނަށް މިފަހުން ގެނައި އިސްލާހުގައިވެސް ވޯޓުކަރުދާސް އަތަށްލިބުމަށްފަހު އެމީހަކު ވޯޓުލާގޮތް ހާމަކުރުމުގެ ގޮތުން ވޯޓުލާ މަރުކަޒުގައި ތިބޭ މީހުންނަށް ފެންނަ ގޮތަށް ވޯޓު ކަރުދާސް އާންމުކޮށް ދައްކާ މީހުންނަށް ވަނީ އަދަބު ކަނޑައަޅާފައެވެ.
އެގޮތުން އެމީހަކު ކުރި އަމަލެއްގެ ކުޑަބޮޑުމިނަށް ބަލައި، އެއް މަސްދުވަހާއި ތިން މަސްދުވަހާ ދެމެދުގެ މުއްދަތަކަށް ޖަލަށްލުން ނުވަތަ 6,000 ރުފިޔާއާއި 18,000 ރުފިޔާއާ ދެމެދުގެ އަދަދަކުން ޖޫރިމަނާކުރުން ހިމަނާފައިވެއެވެ.
Advertisement
This content is created and paid for by advertisers and does not involve Voice Journalists
