މިއަދު ކުރިއަށްދާ މަޖިލިސް އިންތިހާބުގައި ވޯޓުލުމަށް ފަހު މަޑުނުކޮށް ވީހާވެސް އަވަހަށް ވޯޓުލާ މަރުކަޒުން ނުކުތުމަށް އިލެކްޝަން ކޮމިޝަން (އީސީ) ގެ ރައީސް ފުއާދު ތައުފީގު އެދިވަޑައިގެންފިއެވެ.
ފުވާދު ވިދާޅުވީ، ވޯޓުލާ މަރުކަޒުތަކުގެ ތެރޭގައި ހަމަނުޖެހުންތައް ހިނގާ މިންވަރު ކުޑަކުރުމަށްޓަކައި ވޯޓު ދިނުމަށް ފަހު މަރުކަޒުގައި އިތުރަށް މަޑުނުކޮށް ވީހާވެސް އަވަހަކަށް ނިކުތުމަކީ ވަރަށް ބޮޑު އެދުމެއް ކަމަށެވެ. އަދި އިންތިހާބުގައި ވާދަކުރާ ކެންޑިޑޭޓުންނާއި އެމީހުންގެ ސަޕޯޓަރުން ވެސް ވޯޓުފޮށިތައް ކައިރީ މަޑު ނުކުރެއްވުމަށް ވެސް ފުއާދު ވަނީ އިލްތިމާސް ކުރައްވާފައެވެ.
"ވޯޓު ފޮށިތައް ކައިރީގައި މަޑުނުކުރައްވަން އަޅުގަނޑު ހުރިހާ ފަރާތަކަށް މި އެދެނީ. އެއީ ވޯޓު ލާމީހުންނަށް ވިޔަސް އަދި ކުރިމަތިލައްވާ ކެންޑިޑޭޓުންނަށް ވިޔަސް، ކެންޑިޑޭޓުންގެ ސަޕޯޓަރުންނަށް ވިޔަސް، ނޫނީ އަދި ކުޅިބަލަން އަންނަ މީހުންނަށް ވިޔަސް"
ފުއާދު ވިދާޅުވިއެވެ.
މިއަދު ހެނދުނު 8 ޖެހިއިރު މި އިންތިހާބުގެ ވޯޓުލުން ފަށާފައިވާއިރު، ވޯޓްފޮށި ތަކުގެ ކިއު ބަންދުކުރުމަށް އީސީން ނިންމާފައިވަނީ މިއަދު ހަވީރު 5:30 އަށެވެ.
ރައްޔިތުންގެ މަޖިލީހުގެ އިންތިހާބުގައި 42 އަންހެނުންނާއި އަދި 326 ފިރިހެނުން ހިމެނޭހެން ޖުމްލަ 368 ކެންޑިޑޭޓަކު ވާދަކުރާއިރު، މި އިންތިހާބުގައި ވޯޓު ލެވޭ މީހުންގެ އަދަދު 284،887 އަށް އަރައެވެ.
Advertisement
This content is created and paid for by advertisers and does not involve Voice Journalists
