20 ވަނަ ރައްޔިތުންގެ މަޖިލީހުގެ ހުޅުދޫ ދާއިރާގެ ގޮނޑި އެ ދާއިރާއަށް ޕީއެންސީ ޓިކެޓްގައި ވާދަކުރެއްވި މުހައްމަދު ޝާހިދު (ޝާޑު) ކާމިޔާބު ކުރައްވައިފިއެވެ.

ހުޅުދޫ ދާއިރާއަށް ވޯޓު ލުމުގެ ހައްގު ލިބިފައުވާ 2843 މީހުން ތިބި އިރު މިހާތަނަށް ގުނުނު ވޯޓު ފޮށިތަކުގެ ނަތީޖާ ދައްކާ ގޮތުން 57.31 އިންސައްތަ ޝާޑުއަށް ލިބިފައިވާއިރު އެ ދާއިރާއަށް ވާދަކުރެއްވި އެމްޑީޕީ ކެންޑިޑޭޓް ސާމިއު އަންވަރު އަށް ލިބިފައިވަނީ 37.78 އިންސައްތަ ވޯޓެވެ. އެހެންކަމުން އެ ގޮނޑި ސަރުކާރު ކެންޑިޑޭޓް ވަނީ ކާމިޔާބު ކުރައްވާފައެވެ. 

20 ވަނަ ރައްޔިތުންގެ މަޖިލިީހުގެ އިންތިޚާބުގައި ޖުމްލަ 93 ދާއިރާއެއްގެ މެންބަރުން އިންތިޚާބު ކުރާއިރު، އެ ދާއިރާތަކަށް ޕާޓީތަކުން އަދި އަމިއްލަ ގޮތުން 368 ކެންޑިޑޭޓުން ވާދަކުރެއެވެ.

މަޖިލިސް އިންތިޚާބުގައި ވޯޓުލުމުގެ ހައްގު ޖުމްލަ 284،663 މީހަކަށްލިބެއެވެ. މީގެ ތެރޭގައި ހިމެނެނީ 145،302 ފިރިހެނުންނާއި 139،361 އަންހެނުންނެވެ.

އިންތިޚާބުގައި ޖުމްލަ 602 ވޯޓު ފޮށި ބަހައްޓާއިރު، މާލޭގައި 181 ފޮށި، ވިލިމާލޭގައި 9 ފޮށި، ހުޅުމާލޭގައި 51 ފޮށި އަދި އަތޮޅުތަކުގައި 319 ފޮށި އަދި ރިސޯޓުތަކުގައި 34 ފޮށި ވަނީ ބަހައްޓާފައެވެ. މީގެ އިތުރުން ޖަލުތަކުގައި 5 ފޮށި އަދި ރާއްޖޭން ބޭރުގައި 3 ފޮށި ވަނީ ބަހައްޓާފައެވެ.