ކުރީގެ ރައީސް އިބްރާހިމް މުހައްމަދު ޞާލިހު 25 އަހަރު ވަންދެން ތަމްސީލް ކުރެއްވި އަދި އެމްޑީޕީ އުފެދުނީއްސުރެ އެ ޕާޓީން ކާމިޔާބު ކުރަމުން އައި ހިންނަވަރު ދާއިރާގެ ގޮނޑި އެމްޑީޕީ އަށް މިއަދު ގެއްލިއްޖެ އެވެ.

މިއަދު ބޭއްވި ރައްޔިތުންގެ މަޖިލީހުގެ އިންތިހާބުގެ ވަގުތީ ނަތީޖާ ދައްކާ ގޮތުން ހިންނަވަރު ދާއިރާގެ ގޮނޑި ކާމިޔާބުކުރެއްވީ ސަރުކާރު ހިންގާ ޕީއެންސީގެ ފަރާތުން ވާދަކުރެއްވި މުހައްމަދު އަބްދުއްރަހުމާން ކަމެވެ.

އެގޮތުން، ޕީއެންސީގެ ކެންޑިޑޭޓު މުހައްމަދު އަބްދުއްރަހުމާންއަށް 755 ވޯޓު ލިބިފައިވާއިރު، އޭނާއާ އެންމެ ގާތުން ވާދަކުރެއްވި ހިންނަވަރުދާއިރާގެ މިހާރުގެ މެންބަރު އަދި އެމްޑީޕީގެ ކެންޑިޑޭޓު ޖީހާން މަހުމޫދުއަށް ލިބިލެއްވީ 546 ވޯޓެވެ. އަދި އެ ދާއިރާއަށް އަމިއްލަ ގޮތުން ވާދަކުރެއްވި އަބްދު ސަލާމް މޫސާ އަށް 382 ވޯޓު ލިބިފައިވެއެވެ. 

ހިންނަވަރު ދާއިރާ އަކީ ރައީސް ޞާލިހަށާއި އެމްޑީޕީއަށް ތާއީދު ބޮޑު ދާއިރާއެކެވެ. އެ ދާއިރާގެ ގޮނޑީގައި 25 އަހަރު ރައީސް ޞާލިހު އިންނެވި އިރު ހިނގަމުންމިދާ 19 ވަނަ މަޖިލީހުގެ 5 އަހަރު އެ ގޮނޑީގައި އިންނެވީ ޖީހާނެވެ. 

މިފަހަރުގެ މަޖިލިސް އިންތިޚާބުގެ ވަގުތީ ނަތީޖާ ދައްކާ ގޮތުން މަޖިލީހުގެ މިހާރު ހިނގަމުން މިދާ 19 ވަނަ މަޖިލީހުގައި ހިމެނޭ ގިނަ މެންބަރުންނަށް ވަނީ ނާކާމިޔާބީއާ ކުރިމަތިލާން ޖެހުފައެވެ. އެގޮތުން މަޖިލީހުގެ މިހާރުގެ ރައީސް މުހައްމަދު އަސްލަމް އާއި ނައިބު ރައީސް އަހުމަދު ސަލީމް އަދި މަޖިލީހުގެ ކުރީގެ ނައިބު ރައީސް ގަލޮޅު އުތުރު ދާއިރާގެ މެންބަރު އީވާ އަބްދުالله، އާއި ކިނބިދޫ ދާއިރާގެ މެންބަރު ނާޝިޒަށްވެސް ގޮނޑި ދިފާއު ނުކުރެވެއެވެ.

އޭގެ އިތުރުން ޑިމޮކްރެޓްސްގެ އަލީ އާޒިމް އާއި އިބްރާހިމް ރަޝީދު (ބޮންޑާ) އާއި އިމްތިޔާޒު ފަހުމީ (އިންތި)ގެ އިތުރުން ހަސަން ލަތީފަށް ވެސް ގޮނޑި ކާމިޔާބެއް ނުކުރެވުނެވެ. 

ވަގުތީ ނަތީޖާ ދައްކާ ގޮތުން ސަރުކާރު ހިންގާ ޕީއެންސީއަށް ވަނީ މަޖިލީހުގެ މެޖޯރިޓީ ލިބިފައެވެ.