އިއްޔެ ބޭއްވުނު މަޖިލިސް އިންތިޚާބުގައި ވެރިކަންކުރާ ޕީއެންސީއަށް ލިބުނު ފުރިހަމަ ކާމިޔާބީގެ އުފާފާޅު ކުރުމަށް ބާއްވާ ’ދިވެހީންގެ ރާއްޖެ މަޖިލީހަށް- މަރުޙަބާ’’ ޖަލްސާ މިރޭ ބޭއްވުމަށް ހަމަޖެހިއްޖެއެވެ. 

‏ޕްރޮގްރެސިވް ކޮންގްރެސް ކޯލިޝަނުން ބުނީ، ދިވެހި ރައްޔިތުންނަށް މަރްޙަބާ އާއި ޝުކުރު ދެންނެވުމަށް އެ ކޯލިޝަނުން ބާއްވާ ޚާއްޞަ ޖަލްސާ މިރޭ 08:30 ގައި އާޓިފިޝަލް ބީޗް ސަރަހައްދުގައި އޮންނާނެ ކަމަށެވެ. 

އަދި އެ ޖަލްސާއަށް ދިވެހި ހުރިހާ ރައްޔިތުންނަށް ދަޢުވަތު އަރުވާ ކަމަށްވެސް ބުނެފައިވެއެވެ. 

މީގެ އިތުރުން، ޖަލްސާ ނިންމާލާއިރު ހަވާ އެރުވުމުގެ ހަރަކާތެއްވެސް ކުރިއަށް ގެންދެވޭނެ ކަމަށް އެ ކޯލިޝަނުން މައުލޫމާތު ދެއެވެ.

ވިހިވަނަ މަޖިލީހުގެ 93 ދާއިރާއަށް މެންބަރުން ހޮވަން އިއްޔެ ބޭއްވި އިންތިޚާބުގައި ދެ ލައްކައަށް ވުރެ ގިނަ މީހުން ވޯޓުލައިފައިވާއިރު އެ އިންތިޚާބުގައު ޖުމުލަ 90 ދާއިރާއަކަށް ޕީއެންސީގެ ކެންޑިޑޭޓުން ވާދަކުރިއެވެ. އަދި އިދިކޮޅު އެމްޑީޕީން 89 ދާއިރާއަކަށް ވާދަކުރިއެވެ. 

އަދި، އަމިއްލަ 130 ކެންޑިޑޭޓުންނާއި، ޖުމްހޫރީ ޕާޓީ (ޖޭޕީ)ގެ 10 ކެންޑިޑޭޓުންނާއި ދަ ޑިމޮކްރެޓްސްގެ 39 ކެންޑިޑޭޓުން އިންތިޚާބުގައި ވާދަކުރިއެވެ.

އިންތިޚާބުގެ ވަގުތީ ނަތީޖާތައް ދައްކާގޮތުން ސަރުކާރު ހިންގާ ޕީއެންސީން ވަނީ މަޖިލީހުގެ 70 ގޮނޑި ލިބި ސުޕަމެޖޯރިޓީ ލިބިފައިވާއިރު، ޕާޓީގެ ތާއީދާއެކު ގޮނޑި ކާމިޔާބު ކުރި ކެންޑިޑޭޓުން ހިމަނައިގެން ސަރުކާރަށް އެއްބާރުލުން ދޭނެ 75 ކެންޑިޑޭޓުން މަޖިލީހުގައި ތިބޭނެއެވެ.